𞤋𞤪𞤤𞤢𞥄: 𞤥𞤮𞤶𞤮𞤦𞤫𞤪𞤫 𞤱𞤭𞤯𞤮𞤼𞤮𞥅𞤲𞤣𞤫 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫 𞤺𞤭𞤲𞤫 ⹁ 𞤶𞤫𞤴𞤢𞥄𞤲𞤣𞤫 𞤳𞤢 𞤧𞤢𞤤𞤲𞤣𞤵 𞤶𞤢𞤲𞤺𞤲𞤣𞤫 𞤣𞤮𞤱𞤪𞤫 𞤺𞤭𞤲𞤫 𞤲𞤦𞤢𞤪𞤶𞤭𞥅 𞤦𞤭𞤲𞤣𞤭𞤲𞤳𞤮𞥅𞤩𞤫 𞤼𞤢𞤱𞤣𞤢𞤲𞤮𞥅𞤩𞤫 𞤫 𞤬𞤮𞥅𞤤𞤮𞤼𞤭𞤪𞤮.
𞤳𞤮 𞤉 𞤲𞤦𞤮𞤱𞤼𞤮 𞥒𞥐𞥒𞥓 𞤩𞤫 𞤱𞤫𞤪𞤤𞤭𞥅 𞤲𞤺𞤢𞤤 𞤬𞤮𞥅𞤤𞤮𞤼𞤭𞤪𞤢𞤤⹁ 𞤼𞤢𞤱𞤭 𞤮𞤲𞤼𞤵𞤥𞤢 𞤳𞤮 𞤣𞤮𞤳𞤼𞤫𞥅𞤪 𞤶𞤢𞥄𞤳𞤢 𞤧𞤭𞤣𞤭𞤦𞤫 𞤢𞤪𞤣𞤭𞥅𞤯𞤮 𞤶𞤢𞥄𞤺𞤮𞤪𞤢𞤤 𞤳𞤢 𞤲𞤺𞤫𞤴𞤺𞤵 𞤲𞤭𞥅𞤲𞤭𞥅 𞤱𞤮𞤲𞤵𞤲𞤮𞥅 𞤶𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤶𞤢𞤲𞤺𞤲𞤣𞤫 𞤣𞤮𞤱𞤪𞤫.
𞤳𞤮 𞤳𞤢𞤲𞤳𞤮 𞤳𞤢𞤣𞤭 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭 𞤭𞤲𞥆𞤭𞤼𞤭𞤪𞤢𞥄.
𞤳𞤮 𞤫 𞤯𞤫𞤲𞤯𞤫 𞤲𞤢𞤴𞤭 𞤩𞤫 𞤬𞤵𞤯𞥆𞤮𞤪𞤭 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮⹁ 𞤲𞤺𞤮 𞤧𞤭𞤬𞤢 𞤥𞤵𞤲 𞤸𞤢𞤪𞤭 𞤥𞤫𞥅𞤯𞤢𞥄 𞤱𞤢𞤯𞤣𞤫 𞤫 𞤯𞤫𞤲𞤯𞤫 𞤲𞤺𞤫𞤲𞤣𞤭𞥅𞤶𞤫 𞤯𞤫𞤲 𞤲𞤣𞤫𞤪 𞤺𞤭𞤲𞤫.
𞤯𞤵𞤲: 𞤆𞤵𞤤𞤢𞤪⹁ 𞤧𞤮𞥅𞤧𞤮⹁ 𞤳𞤨𞤫𞤤𞤫𞥅⹁ 𞤳𞤢𞤻𞤵𞤲 𞤫 𞤥𞤢𞤲𞤭𞤲𞤳𞤢.
𞤧𞤢𞤪𞤭𞤴𞤢 𞤼𞤢𞤱𞤣𞤫𞤺𞤮𞤤 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤸𞤢𞤪𞤭 𞤳𞤮 𞤱𞤭𞤲𞤣𞤵𞤺𞤮𞤤 𞤬𞤭𞤤𞥆𞤢𞤴𞤫𞥅⹁ 𞤥𞤢𞤤𞥆𞤢 𞤳𞤫𞤩𞥆𞤭𞤼𞤮𞤤(𞤪𞤮𞤥𞤢𞤲) 𞤴𞤫𞤱𞤼𞤢𞤴𞤯𞤮 𞤬𞤭𞥅 𞤳𞤮 𞤴𞤢𞤸𞤣𞤭 𞤫 𞤲𞤺𞤵𞥅𞤪𞤲𞤣𞤢𞤲 𞤺𞤭𞤲𞤫𞤲𞤢𞥄𞤩𞤫 𞤩𞤫𞤲 𞤫 𞤬𞤭𞤲𞤢𞥄 𞤼𞤢𞤱𞤢𞥄𞤶𞤭 𞤥𞤢𞤩𞥆𞤫. 𞤸𞤢𞤪𞤢 𞤳𞤢𞤣𞤭 𞤣𞤫𞤬𞤼𞤫𞤪𞤫 𞤲𞤣𞤫𞤲 𞤬𞤫𞤰𞥆𞤢𞥄𞤤𞤭 𞤯𞤫𞤪𞤭 𞤧𞤢𞤨𞥆𞤮.
𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤳𞤮 𞤼𞤢𞤼𞤮 𞥓 𞤱𞤢𞤪𞤶𞤫𞤼𞤫𞥅 𞤫 𞤯𞤫𞤲𞤺𞤢𞤤 𞤳𞤢𞤤𞤢.
𞤨𞤵𞤤𞤢𞤪 𞤸𞤫𞤩𞤵𞤲𞤮 𞥑𞥙 𞤱𞤭𞤲𞤣𞤵𞤩𞤫 𞤲𞤢𞤩𞤭.
𞤥𞤢𞤲𞤭𞤲𞤳𞤢 𞥗.
𞤳𞤨𞤫𞤤𞤫𞥅 𞥔.
𞤫 𞤧𞤮𞥅𞤧𞤮 𞥒.
𞤨𞤵𞤤𞤢𞤪 𞤸𞤫𞤩𞤭 𞤱𞤢𞤪𞤶𞤢𞥄𞤩𞤫 𞥓⹁ 𞤧𞤮𞤲𞥆𞤢𞥄𞤶𞤮 𞤱𞤮𞤲𞤭 𞤢𞤪𞤢𞤲𞤮 𞤮𞤲.
𞥑- 𞤳𞤢𞤶𞥆𞤢𞤼𞤵 𞤶𞤭𞤦𞤢 𞤶𞤢𞤤𞥆𞤮: 𞤼𞤢𞤤𞥆𞤢𞤲𞤤𞤢𞤳𞥆𞤫 𞤢𞤤𞤮𞥅-𞤢𞤤𞤮𞥅
𞥒-𞤢𞤤𞤸𞤢𞤧𞤢𞤲𞤢 𞤦𞤢𞥄: 𞤼𞤵𞤲𞤺𞤮
𞥓-𞤥𞤢𞤥𞥆𞤢𞤣𞤵 𞤢𞤪𞤢𞤦𞤭𞥅𞤴𞤵 𞤶𞤢𞤤𞥆𞤮 :𞤳𞤢𞥄𞤱𞤫𞥅
𞤥𞤢𞤲𞤭𞤲𞤳𞤢 𞤳𞤮 𞤯𞤭𞤯𞤮 𞤲𞤦𞤢𞤪𞤶𞤢𞥄 𞤼𞤢𞤱𞤣𞤫 𞤸𞤫𞤣𞥆𞤭𞤼𞤭𞥅𞤩𞤫 𞤩𞤫𞤲 𞤼𞤭𞤥𞥆𞤭𞤲𞤢𞥄𞤲𞤮 𞤧𞤢𞤪𞤭𞤴𞤢𞥄𞤶𞤭 𞤸𞤢𞥄𞤤𞤣𞤢𞥄𞤯𞤭 𞤯𞤭𞤲.
𞤳𞤨𞤫𞤤𞤫𞥅 𞥓 𞤳𞤢𞤣𞤭 𞤲𞤦𞤢𞤪𞤶𞤢𞥄.
𞤫 𞤧𞤮𞥅𞤧𞤮 𞤳𞤮 𞥒 𞤲'𞤣𞤫 𞤼𞤢𞤱𞤣𞤫 𞤳𞤮 𞤳𞤢𞤥𞤩𞤫 𞤯𞤭𞤯𞤮 𞤨𞤫𞤼 𞤢𞤣𞥆𞤵𞤲𞤮𞥅 𞤱𞤭𞤲𞤣𞤢𞤲𞤯𞤫.
𞤍𞤫𞥅 𞤱𞤭𞤲𞤣𞤢𞤲𞤯𞤫 𞤲𞤦𞤢𞤪𞤶𞤢𞥄𞤩𞤫 𞤯𞤮𞥅⹁ 𞤯𞤫 𞤬𞤮𞤱 𞤯𞤫 𞤸𞤢𞤱𞤼𞤭𞤲𞤣𞤭𞤪𞤢𞥄 𞤫 𞤣𞤫𞤬𞤼𞤫𞤪𞤫 𞤱𞤮𞥅𞤼𞤫𞤼𞤫𞤪𞤫 𞤲'𞤣𞤫 𞤯𞤫𞤪𞤭 𞥑𞥒𞥐 𞤴𞤢𞤤𞤼𞤭𞤲𞤢𞥄⹁ 𞤯𞤵𞤲 𞤱𞤮𞤲𞤭 𞤣𞤫𞤬𞤼𞤫𞤪𞤫 𞤲𞤣𞤫 𞥑𞥐 𞤱𞤭𞤲𞤣𞤭.
𞤉 𞤯𞤫𞥅 𞤲𞤦𞤢𞤪𞤶𞤢𞥄𞤶𞤫 𞤢𞤪𞤢𞤲𞤮 𞤮𞤲 𞤳𞤢 𞤸𞤫𞤩𞤢𞤴𞤲𞤮 𞤸𞤢𞥄𞤶𞤢𞤥𞤫 𞥑𞥐⹁ 𞤥𞤭𞤤𞤭𞤴𞤮𞤲 𞥑𞥐
𞤯𞤭𞤯𞤢𞤩𞤮 𞤮𞤲 𞤸𞤢𞥄𞤶𞤢𞤥𞤫 𞥘⹁ 𞤥𞤭𞤤𞤭𞤴𞤮𞤲 𞥘
𞤫 𞤼𞤢𞤼𞤢𞤩𞤮 𞤮𞤲 𞤸𞤫𞤩𞤢 𞤸𞤢𞥄𞤶𞤢𞤥𞤫 𞥖⹁ 𞤥𞤭𞤤𞤭𞤴𞤮𞤲 𞤶𞤫𞥅𞤺𞤮𞥅.
𞤉𞤲 𞤢𞤲𞤣𞤭𞤼𞤭𞤲𞤢𞤴 𞤼𞤵𞤲 𞤸𞤭𞤳𞥆𞤭𞤼𞤢𞤲𞤮 𞤫 𞤲𞤺𞤮𞥅 𞤶𞤮𞤺𞤲𞤭𞤼𞤮 𞤲𞤦𞤢𞤪𞤶𞤢𞥄𞤶𞤭⹁ 𞤱𞤫𞥅𞤩𞤭𞤼𞤵𞤺𞤮𞤤 𞤣𞤫𞤬𞤼𞤫 𞥖 𞤯𞤫 𞤱𞤢𞤤𞥆𞤮𞤲𞤣𞤭𞤪𞤢𞤤 𞤭𞤪𞤤𞤢𞥄 𞤫 𞤢𞤪𞤥𞤢𞤼𞤢𞤲 𞤺𞤭𞤲𞤫 𞤴𞤢𞤤𞤼𞤭𞤲𞤭.
𞤯𞤵𞤲 𞤳𞤮:
𞥑-𞤣𞤫𞤬𞤼𞤫𞤪𞤫 𞤼𞤢𞥄𞤤𞤭 𞤫 𞤸𞤢𞥄𞤤𞤢 𞤳𞤭𞤧𞤭
𞥒- 𞤣𞤫𞤬𞤼𞤫𞤪𞤫 𞤼𞤢𞥄𞤤𞤭 𞤫 𞤸𞤢𞥄𞤤𞤢 𞤥𞤢𞤲𞤭𞤲𞤳𞤢.
𞥓- 𞤣𞤫𞤬𞤼𞤫𞤪𞤫 𞤼𞤭𞤲𞤣𞤭 𞤫 𞤶𞤭𞤩𞤭𞤤𞤭𞤩𞤭⹁ 𞤫 𞤸𞤢𞥄𞤤𞤢 𞤱𞤢𞤥𞤫𞥅⁏ 𞤤𞤫𞤻𞤮𞤤 𞤩𞤵𞤪𞤲𞤺𞤮𞤤 𞤸𞤫𞥅𞤱𞤣𞤫 𞤴𞤵𞤳𞤵𞤲𞤳𞤵 𞤫 𞤲𞤣𞤫𞤪 𞤳𞤵𞤲𞤣𞤢𞥄𞤪𞤢.
𞥔- 𞤣𞤫𞤬𞤼𞤫𞤪𞤫 𞤧𞤢𞤺𞥆𞤭𞤼𞤮𞤪𞤣𞤫⹁ 𞤫 𞤼𞤭𞤲𞤣𞤭 𞤫 𞤸𞤢𞥄𞤤𞤢 𞤤𞤫𞥅𞤤𞤫𞥅.
𞥕- 𞤧𞤢𞤺𞥆𞤭𞤼𞤮𞤪𞤣𞤫 𞤬𞤢𞤪𞤢𞤲𞤧𞤭 𞤫 𞤤𞤮𞥅𞤥𞤢⁏ 𞤸𞤢𞥄𞤤𞤢 𞤼𞤮𞥅𞤥𞤢𞥄𞤩𞤫 𞤩𞤫𞤲.
𞥖- 𞤉 𞤣𞤫𞤬𞤼𞤫𞤪𞤫 𞤳𞤢 𞤣𞤫𞤬𞤼𞤮𞤴 𞤳𞤮 𞤬𞤮𞥅𞤤𞤮𞤼𞤭𞤪𞤩𞤫 𞤩𞤫𞤲 𞤱𞤭𞤲𞤣𞤭 𞤳𞤮𞤲 𞤸𞤢𞤱𞤼𞤭𞤲𞤣𞤭𞤪𞤢𞥄 𞤫 𞤣𞤫𞤬𞤼𞤫𞤪𞤫 𞤱𞤮𞥅𞤼𞤫𞤪𞤫 𞤯𞤫 𞤸𞤢𞤱𞤪𞤭 𞤯𞤫𞤪𞤭 𞥑𞥒𞥐.
𞤭𞤪𞤤𞤢𞥄 𞤸𞤫𞤩𞤭𞥅 𞤣𞤵𞥅𞤩𞤭 𞥕𞥔 𞤺𞤭𞤦𞤭 𞤧𞤭𞤲𞤷𞤢𞥄 𞤳𞤮𞤲𞤮 𞤳𞤮 𞤫 𞤲'𞤺𞤮𞤤 𞤯𞤮𞥅 𞤩𞤫 𞤱𞤢𞥄𞤱𞤭 𞤴𞤢𞤤𞤼𞤭𞤲𞤣𞤫 𞤣𞤫𞤬𞤼𞤫 𞤼𞤢𞤱𞤢 𞤸𞤭𞤯𞤫 𞤸𞤫𞤱𞤼𞤭 𞤯𞤫𞤪𞤭 𞥑𞥐𞥐⹁ 𞤼𞤢𞤱𞤢 𞤳𞤢𞤣𞤭 𞤳𞤮 𞤫 𞤥𞤵𞥅𞤤𞤢𞤲𞤣𞤫 𞤤𞤢𞤦𞤢𞥄𞤲𞤣𞤫.
𞤍𞤵𞤲 𞤸𞤮𞤤𞥆𞤭 𞤺𞤭𞤦𞤭 𞤣. 𞤂𞤢𞥄𞤥𞤭𞥅𞤲𞤭 𞤳𞤫𞤴𞤼𞤢 𞤢𞤪𞤣𞤭𞥅 𞤭𞤪𞤤𞤢𞥄 𞤺𞤮𞤤𞥆𞤫 𞤥𞤢𞤩𞥆𞤫 𞤯𞤫𞤲 𞤸𞤭𞤲𞤮 𞤴𞤢𞤸𞤪𞤵𞤣𞤫 𞤴𞤫𞥅𞤧𞤮 𞤬𞤮𞤼𞤢.
𞤣𞤮𞤳𞤼𞤫𞥅𞤪 𞤥𞤢𞤥𞥆𞤢𞤣𞤵 𞤤𞤢𞥄𞤥𞤭𞥅𞤲𞤭 𞤦𞤭𞤲𞤼𞤵 𞤳𞤫𞤴𞤼𞤢⹁ 𞤢𞤪𞤣𞤭𞥅𞤯𞤮 𞤭𞤪𞤤𞤢𞥄 𞤮𞤲 𞤢𞤲𞤣𞤭𞤲𞤼𞤭𞤲𞥆𞤮 𞤱𞤮𞤲𞤣𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤳𞤮 𞤶𞤮𞤳𞥆𞤭𞤼𞤮𞤼𞤮𞥅 𞤲𞤺𞤮⹁ 𞤫 𞤲𞤣𞤫𞤪 𞤯𞤫𞤲𞤯𞤫 𞤶𞤫𞥅𞤼𞤢𞤼𞤭 𞤴𞤵𞤩𞥆𞤢𞥄𞤯𞤫 𞤬𞤭𞥅 𞤶𞤢𞤲𞤺𞤭𞤲𞤫 𞤳𞤢 𞤤𞤫𞤧𞤣𞤭 𞤺𞤭𞤲𞤫.
𞤫𞤲 𞤢𞤪𞤼𞤮𞤴𞤢𞤴 𞤫 𞤳𞤵𞤥𞤨𞤭𞤼𞤫 𞤸𞤫𞤣𞤹𞤭𞥅𞤯𞤫 𞤯𞤫𞤲 𞤧𞤭 𞤀𞤂𞤂𞤀 𞤶𞤢𞤩𞤭𞥅 𞤱𞤮𞤼𞤢 𞤶𞤵𞥅𞤼𞤵 𞤥𞤮𞤰𞥆𞤢.
𞤋𞤧𞤳𞤭𞤲 𞤭𞤪𞤤𞤢𞥄 𞤩𞤫 𞤺𞤮𞤤𞥆𞤭𞥅
𞤋𞤧𞤳𞤭𞤲 𞤭𞤪𞤤𞤢𞥄 𞤺𞤮𞤤𞥆𞤫 𞤯𞤫𞤲 𞤸𞤭𞤲𞤮 𞤴𞤮𞥅𞤯𞤭