𞤑𞤮𞥅𞤸𞤮𞥅𞤩𞤫 𞤼𞤫𞤣𞥆𞤵𞤩𞤫⹁ 𞤅𞤭𞤯𞤩𞤫 𞤫 𞤒𞤭𞥅𞤯𞤩𞤫.
𞤖𞤢𞤲𞤣𞤫 𞤥𞤭𞤯𞤮 𞤱𞤫𞤱𞤤𞤭𞤪𞤭 𞤬𞤮𞤼𞤢 𞤸𞤫𞤲𞤣𞤢𞤺𞤮𞤤 𞤲𞤣𞤭𞥅 𞤲𞤦𞤢𞤪𞤲𞤶𞤢𞥄𞤪 𞤕𞤉𞤈𞤐𞤌 𞤅𞤀𞤃𞤄𞤀 𞤃𞤌𞤃𞤄𞤉𞤒𞤀𞥄 𞤬𞤭𞥅 𞤲𞤦𞤭𞤲𞤣𞤭𞤲𞤳𞤫𞥅𞤶𞤮 𞤸𞤭𞤼𞤢𞥄𞤲𞤣𞤫 𞥒𞥐𞥒𞥔 𞤲𞤣𞤭 𞤅𞤓𞤑𞤀𞥄𞤇𞤉 𞤀𞤁𞤂𞤀𞤃 𞤏𞤋𞤐𞤁𞤉𞤈𞤉 𞤱𞤢𞤯𞤢𞤲𞤭 𞤤𞤢𞤲. 𞤍𞤵𞤲 𞤯𞤮𞥅 𞤳𞤮 𞤱𞤫𞤤𞤮 𞤱𞤫𞤤𞤮 𞤫 𞤱𞤫𞤤𞤼𞤢𞥄𞤪𞤫 𞤲𞤣𞤫 𞤧𞤭𞤺𞤵 𞤥𞤵𞤲 𞤢𞤤𞤢𞥄 𞤱𞤮𞤲𞤢𞤲𞤣𞤫 𞤤𞤢𞤥.
𞤃𞤭 𞤶𞤢𞥄𞤪𞤲𞤭𞥅 𞤬𞤮𞤼𞤢 𞤥𞤮𞤶𞤮𞤦𞤫𞤪𞤫 𞤧𞤵𞤳𞤢𞥄𞤩𞤫 𞤢𞤣𞤤𞤢𞤥 𞤱𞤭𞤲𞤣𞤫𞤪𞤫 𞤳𞤮 𞤧𞤵𞤩𞤭𞥅𞤥𞤭 𞤧𞤵𞥅𞤼𞤭 𞤸𞤢𞥄 𞤼𞤮𞤯𞥆𞤭𞥅𞤩𞤫 𞤫 𞤸𞤮𞥅𞤪𞤫 𞤯𞤵𞥅𞤯𞤵𞤣𞤫 𞤱𞤭𞤲𞤣𞤮𞥅𞤩𞤫. 𞤖𞤢𞥄 𞤫 𞤱𞤭𞤲𞤣𞤫𞤲 𞤶𞤢𞤲𞤺𞤫𞤲 𞤢𞤣𞤤𞤢𞤥 𞤺𞤭𞤲𞤫⹁ 𞤫 𞤥𞤮𞤶𞤮𞤦𞤫 𞤱𞤭𞤲𞤣𞤢 𞤶𞤢𞤲𞤺𞤢 𞤯𞤫𞤲 𞤬𞤮𞤱 𞤳𞤢 𞤣𞤢𞤪𞤢𞤺𞤮𞤤 𞤶𞤢𞤲𞤺𞤭𞤲𞤢 𞤲𞤺𞤮𞤤 𞤦𞤭𞤲𞤣𞤮𞤤 𞤢𞤣𞤤𞤢𞤥⹁ 𞤫 𞤣𞤫𞤲𞤣𞤢𞥄𞤲𞤺𞤢𞤤 𞤣𞤢𞤪𞤭𞥅𞤩𞤫 𞤲𞤮 𞤨𞤵𞤤𞤢𞤪 𞤫 𞤯𞤫𞤲𞤯𞤫 𞤢𞤬𞤪𞤭𞤳 𞤫 𞤲𞤺𞤵𞤣𞤢𞥄𞤯𞤭 𞤥𞤵𞤵𞤲 𞤶𞤢𞥄𞤤𞤮𞤪𞤢⹁ 𞤲𞤢𞤩𞤪𞤢 𞤷𞤮𞤧𞤢𞥄𞤲𞤫𞥅𞤶𞤭 𞤥𞤫𞤫𞤲 𞤴𞤫𞥅𞤧𞤮.
𞤃𞤭 𞤶𞤢𞥄𞤪𞤲𞤭𞥅 𞤴𞤵𞤥𞥆𞤢 𞤢𞤥 𞤫 𞤦𞤢𞥄𞤦𞤫𞤲 𞤢𞤥⹁ 𞤫 𞤷𞤫𞤪𞤲𞤮𞥅𞤩𞤫 𞤢𞤥 𞤫 𞤥𞤵𞥅𞤧𞤭𞤣𞤢𞤤 𞤢𞤥 𞤳𞤮 𞤲𞤫𞤸𞤭𞤪𞤥𞥆𞤭 𞤺𞤭𞤯𞤺𞤮𞤤 𞤨𞤵𞤤𞤢𞤪⹁ 𞤸𞤢𞥄 𞤸𞤫𞤱𞤼𞤢 𞤩𞤫𞤴𞤲𞤺𞤵 𞤢𞤲 𞤥𞤮 𞤸𞤢𞤩𞤢𞥄𞤤𞤭 𞤲𞤮 𞤼𞤢𞤥𞤦𞤭𞤼𞤭𞥅 𞤼𞤢𞤱𞤼𞤭𞤥𞥆𞤭.
𞤃𞤭 𞤧𞤫𞥅𞤪𞤢𞤼𞤢𞥄 𞤱𞤫𞤤𞤼𞤢𞤲𞤢𞤺𞤮𞤤 𞤲𞤣𞤢𞤴𞤺𞤵 𞤪𞤫𞤲𞤣𞤮 𞤥𞤫𞤫𞤲 𞤮𞤳𞤢𞥄𞤩𞤫 𞤧𞤫𞤲𞤣𞤭 𞤧𞤭𞤲𞤷𞤵𞤩𞤫 𞤦𞤭𞤲𞤣𞤮𞤤 𞤢𞤣𞤤𞤢𞤥⹁ 𞤥𞤭 𞤱𞤢𞤷𞥆𞤢 𞤧𞤫𞤴𞤣𞤭 𞤦𞤢𞤪𞤭 𞤫𞤲⹁ 𞤷𞤫𞤪𞤲𞤮 𞤭𞤦𞤪𞤢𞥄𞤸𞤭𞥅𞤥𞤢 𞤶𞤮𞤺𞤮 𞤫 𞤷𞤫𞤪𞤲𞤮 𞤢𞤦𞤵𞤤𞤤𞤢𞥄𞤸𞤭 𞤦𞤢𞤪𞤭. 𞤘𞤮𞤤𞥆𞤫 𞤯𞤫𞥅 𞤸𞤮𞤴𞤢𞥄𞤤𞤭⹁ 𞤳𞤮𞤲𞤮 𞤸𞤢𞤲𞤣𞤫 𞤥𞤭 𞤱𞤭𞤢𞤴 𞤦𞤢𞤯𞤼𞤭 𞤥𞤭 𞤸𞤢𞤱𞤪𞤭 𞤫 𞤯𞤫𞥅 𞤷𞤢𞤯𞤫𞥅𞤤𞤫.⹁
𞤃𞤵𞤧𞤭𞤣𞤩𞤫 𞤼𞤫𞤣𞥆𞤵𞤩𞤫 𞤳𞤮𞤲𞤺𞤭 𞤶𞤢𞥄𞤪𞤲𞤵𞤺𞤮𞤤 𞤮𞤲 𞤲𞤮 𞤱𞤢𞥄𞤧𞤭𞤪𞤭 𞤤𞤢𞤥 𞤸𞤢𞤳𞥆𞤫 𞤥𞤢 𞤱𞤫𞤤𞤼𞤢𞥄𞤪𞤫⹁ 𞤲𞤮𞥅𞤼𞤢𞤺𞤮𞤤 𞤧𞤫𞤥𞤦𞤭𞤲𞤢 𞤲𞤺𞤢𞤤 𞤬𞤮𞤼𞥆𞤭𞤺𞤢𞤤 𞤼𞤢𞤼𞤢𞤩𞤢𞤤 𞤻𞤢𞤤𞤢𞥄𞤲𞤣𞤫 𞤢𞤣𞤤𞤢𞤥 𞤫 𞤨𞤵𞤤𞤢𞥄𞤳𞤵⹁ 𞤲𞤮 𞤱𞤢𞤤𞥆𞤭𞤲𞤭 𞤤𞤢𞤲 𞤩𞤫𞤪𞤲𞤣𞤫⹁ 𞤯𞤵𞤲 𞤯𞤮𞥅 𞤳𞤮 𞤥𞤢𞥄𞤲𞤣𞤫 𞤺𞤭𞤲𞤯𞤺𞤮𞤤 𞤫 𞤺𞤮𞤤𞥆𞤫 𞤯𞤫 𞤧𞤵𞤳𞤢𞥄𞤩𞤫 𞤢𞤣𞤤𞤢𞤥 𞤱𞤭𞤲𞤣𞤫𞤪𞤫 𞤫 𞤱𞤭𞤲𞤣𞤫𞤲 𞤶𞤢𞤲𞤺𞤫𞤲 𞤢𞤣𞤤𞤢𞤥 𞤥𞤮 𞤳𞤢𞤤𞤢 𞤳𞤢 𞤸𞤭𞤳𞥆𞤮𞤪𞤭 𞤶𞤮𞤳𞥆𞤭 𞤳𞤮𞤲 𞤸𞤭𞤲𞤮 𞤦𞤢𞤯𞤼𞤭𞤲𞤣𞤫 𞤬𞤮𞤼𞤢 𞤩𞤫𞤴𞤣𞤫𞤲 𞤧𞤮𞥅𞤦𞤫𞥅.
𞤃𞤭 𞤱𞤢𞤯𞤢𞤲𞤭𞥅 𞤲𞤣𞤭𞥅 𞤲𞤦𞤢𞤪𞤶𞤢𞥄𞤪𞤭⹁ 𞤣𞤫𞤲𞤣𞤢𞥄𞤲𞤺𞤢𞤤 𞤣𞤢𞤣𞤭𞤼𞤭𞥅 𞤣𞤢𞤪𞤭𞥅 𞤲𞤮 𞤱𞤭𞤲𞤣𞤢 𞤶𞤢𞤲𞤺𞤭𞤲𞤢 𞤲𞤺𞤮𞤤 𞤦𞤭𞤲𞤣𞤮𞤤 𞤥𞤫𞥅𞤯𞤫𞤲⹁ 𞤸𞤮𞥅𞤤𞤭𞥅𞤩𞤫 𞤨𞤮𞤤𞤺𞤢𞤤⹁ 𞤨𞤮𞤼𞥆𞤢𞤤 𞤫 𞤩𞤢𞤽𞤼𞤢𞤤 𞤥𞤫𞤲 𞤳𞤮 𞤫 𞤯𞤭𞥅 𞤲𞤫𞤱𞤮𞤼𞤮𞥅.
𞤖𞤢𞤲𞤣𞤫 𞤯𞤮𞥅 𞤫 𞤳𞤭𞥅 𞤧𞤢𞥄𞤭 𞤯𞤮𞥅⹁ 𞤥𞤵𞥅𞤧𞤭𞤣𞤩𞤫 𞤼𞤫𞤣𞥆𞤵𞤩𞤫 𞤫𞤲 𞤴𞤢𞤥𞤮𞤲𞤣𞤭𞤪𞤭 𞤩𞤫𞤴𞤣𞤵𞤺𞤮𞤤 𞤱𞤢𞤳𞥆𞤭𞤤𞤢𞥄𞤪𞤫 𞤲𞤮 𞤯𞤫𞤥𞤲𞤺𞤢𞤤 𞤥𞤫𞤲⹁ 𞤷𞤮𞤧𞤢𞥄𞤲𞤭 𞤥𞤫𞤲 𞤲𞤮 𞤤𞤢𞤴𞤭𞤪𞤢 𞤶𞤢𞥄𞤤𞤮𞥅⹁ 𞤥𞤮 𞤳𞤢𞤤𞤢 𞤲𞤮 𞤱𞤮𞥅𞤣𞤭 𞤳𞤮 𞤱𞤢𞤤𞥆𞤭𞤪𞤼𞤢 𞤫𞤲⹁ 𞤱𞤮𞤼𞤢 𞤥𞤮 𞤴𞤢𞤱𞤭𞤼𞤮𞥅 𞤳𞤵𞥅𞤺𞤢𞤤 𞤥𞤵𞤲 𞤳𞤮 𞤬𞤢𞤲𞤯𞤭 𞤱𞤮.
𞤆𞤵𞤤𞤢𞤪 𞤸𞤭𞤲𞤮 𞤱𞤭𞤭 ”𞤃𞤮 𞤳𞤢𞤤𞤢 𞤧𞤭 𞤮𞤳𞥆𞤭𞥅 𞤳𞤮 𞤥𞤢𞤪𞤭⹁ 𞤸𞤢𞤴 𞤫 𞤺𞤮𞥅𞤼𞤮𞤯𞤮 𞤼𞤢𞤥𞤨𞤢𞤼𞤢𞥄“ 𞤳𞤮 ”𞤷𞤭𞤲𞤼𞤫 𞤷𞤭𞤲𞤼𞤫 𞤸𞤫𞤦𞥆𞤭𞤲𞤭 𞤥𞤢𞥄𞤴𞤮“
𞤑𞤢 𞤢𞤧𞤶𞤵𞥅𞤼𞤲𞤵𞤺𞤮𞤤⹁ 𞤥𞤭 𞤱𞤢𞤴𞤲𞤭𞤼𞤮𞤪𞤭 𞤱𞤭𞤵𞤺𞤮𞤤 𞤮𞤲 𞤢𞤤𞤦𞤢𞤪𞤳𞤢 𞤮𞤲 𞤶𞤢𞥄𞤪𞤢𞥄𞤥𞤢.
𞤔𞤫𞤲𞥆𞤫 𞤣𞤮𞤺𞤵𞤧𞤢𞤤𞤭.
