𞤙𞤢𞤤𞤢𞥄𞤲𞤣𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤪𞤫 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫⹁ 𞤥𞤢𞤱𞤲𞤭𞤲𞤼𞤫𞥅𞤯𞤮 𞤸𞤭𞤼𞤢𞥄𞤲𞤣𞤫 𞤳𞤢𞤤𞤢 𞤻𞤢𞤤𞤲𞤣𞤫 𞥒𞥑 𞤷𞤮𞤤𞤼𞤮⹁ 𞤳𞤮 : 𞤭𞤲𞤫𞤧𞤳𞤮𞥅 UNESCO 𞤧𞤭𞤲𞤷𞤭 𞤯𞤵𞤲 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥙⹁ 𞤲𞤺𞤢𞤥 𞤩𞤢𞤲𞤼𞤵𞤣𞤫 𞤳𞤫𞥅𞤱𞤢𞤤 𞤯𞤫𞤲𞤯𞤫 𞤫 𞤨𞤭𞤲𞤫.
𞤻𞤢𞤤𞤢𞥄𞤲𞤣𞤫 𞤲𞤣𞤫𞥅 𞤳𞤮 𞤰𞤫𞤼𞥆𞤭 𞤩𞤵𞤤𞤣𞤭 𞤥𞤵𞤲 𞤳𞤮 𞤼𞤮 𞤦𞤫𞤲𞤺𞤢𞤤𞤢𞤣𞤫𞥅𞤧⹁𞤲𞤮𞤣𞥆𞤭𞤪𞤼𞤫𞤲𞤮𞥅𞤲𞤣𞤭(𞤨𞤢𞤳𞤭𞤧𞤼𞤢𞤲 𞤬𞤵𞤯𞤲𞤢𞥄𞤲𞤺𞤫) 𞤻𞤢𞤤𞤲𞤣𞤫 𞥒𞥑 𞤷𞤮𞤤𞤼𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥕𞥒⹁ 𞤲𞤣𞤫 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤫 𞤶𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫 𞤱𞤢𞤯𞤵𞤲𞤮𞥅 𞤧𞤫𞤨𞥆𞤵𞤪𞤵⹁ 𞤸𞤮𞤤𞥆𞤭 𞤥𞤫𞤼𞥆𞤵 𞤩𞤫𞤪𞤲𞤣𞤫 𞤥𞤵𞤲⹁ 𞤲𞤺𞤢𞤥 𞤴𞤮 𞤯𞤫𞤲𞤺𞤢𞤤 𞤥𞤢𞤩𞥆𞤫 𞤲𞤺𞤢𞤤 𞤱𞤭𞤴𞤫𞤼𞤫𞥅𞤲𞤺𞤢𞤤 𞤦𞤫𞤲𞤺𞤢𞤤𞤭𞥅 𞤤𞤢𞤱𞤯𞤭𞤲𞤫 𞤳𞤢 𞤲𞤶𞤵𞤩𞥆𞤵𞤣𞤭 𞤤𞤢𞥄𞤥𞤵⹁ 𞤧𞤢𞤦𞤵 𞤰𞤫𞤼𞥆𞤵𞤺𞤮𞤤 𞤲𞤺𞤵 𞤯𞤫𞤲𞤺𞤢𞤤 𞤵𞤪𞤣𞤵 𞤲𞤺𞤢𞤤 𞤶𞤢𞥄𞤤𞤭𞥅𞤲𞤺𞤢𞤤 𞤱𞤮𞤱𞤤𞤫𞥅𞤣𞤫 𞤨𞤢𞤳𞤭𞤧𞤼𞤢𞤲 𞤸𞤭𞥅𞤪𞤲𞤢𞥄𞤲𞤺𞤫⹁ 𞤱𞤮𞤲𞤼𞤵𞤲𞤣𞤭 𞤸𞤢𞤲𞤣𞤫 𞤨𞤢𞤳𞤭𞤧𞤼𞤢𞤲⹁𞤱𞤢𞤯𞥆𞤭𞤲𞤢 𞤫 𞤸𞤮𞥅𞤪𞤫 𞤥𞤢𞤩𞥆𞤫⹁ 𞤼𞤫𞤪𞤼𞤭𞤲𞤢𞤩𞤫 𞤯𞤫𞤲𞤺𞤢𞤤 𞤥𞤢𞤩𞥆𞤫 𞤲𞤺𞤢𞤤⹁ 𞤩𞤵𞤪𞤲𞤺𞤢𞤤 𞤶𞤢𞥄𞤤𞤢𞥄𞤣𞤫 𞤳𞤢 𞤥𞤢𞤩𞥆𞤫.
𞤐𞤺𞤮𞤲 𞤼𞤭𞤨𞥆𞤭𞤪𞤮 𞤥𞤢𞤩𞥆𞤫 𞤢𞤣𞥆𞤭 𞤸𞤢𞤩𞤪𞤫 𞤥𞤢𞤱𞤲𞤣𞤫 𞤫 𞤶𞤭𞥅𞤩𞤮𞤤𞤣𞤵 𞤸𞤢𞤳𞥆𞤵𞤲𞤣𞤫 𞤥𞤢𞤩𞥆𞤫 𞤫 𞤤𞤢𞥄𞤥𞤭𞤲𞤮𞥅𞤩𞤫 𞤮𞤲𞤼𞤵𞤲𞤢 𞤩𞤫𞤲⹁ 𞤯𞤵𞤥 𞤱𞤢𞤯𞤭 𞤸𞤢𞥄 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤦𞤵𞤴 𞤱𞤢𞤪𞤢𞥄 𞤫 𞤲𞤣𞤫𞤪 𞤥𞤵𞤲.
𞤙𞤢𞤤𞤲𞤣𞤫 𞥒𞥑 𞤷𞤮𞤤𞤼𞤮 𞤲𞤮𞤲 𞤱𞤮𞤲𞤼𞤭𞥅 𞤥𞤢𞥄𞤲𞤣𞤫 𞤼𞤭𞤨𞥆𞤭𞤪𞤢𞤲𞤺𞤮𞤤 𞤯𞤫𞤲𞤯𞤫 𞤲𞤫𞥅𞤲𞤭𞥅𞤶𞤫⹁ 𞤫 𞤶𞤮𞤺𞤲𞤵𞤼𞤵𞤺𞤮𞤤 𞤯𞤫 𞤸𞤢𞤹𞥆𞤫𞥅 𞤱𞤮𞤱𞤤𞤵𞤺𞤮𞤤 𞤫 𞤶𞤢𞤲𞤺𞤵𞤺𞤮𞤤 𞤫 𞤯𞤫𞤲𞤺𞤢𞤤 𞤥𞤵𞤲 𞤥𞤵𞤴𞤲𞤢𞥄𞤲𞤺𞤢𞤤 𞤸𞤢𞤪𞤢 𞤤𞤮𞤪𞥆𞤢𞥄𞤳𞤢 𞤥𞤢𞤤𞥆𞤢 𞤩𞤭𞤯𞤼𞤭𞤲𞤫𞥅 𞤫 𞤥𞤵𞤲.
𞤊𞤫𞤣𞥆𞤫 𞤭𞤲𞤫𞤧𞤳𞤮𞥅 UNESCO 𞤬𞤫𞤤𞥆𞤭𞤼𞤭 𞤼𞤫𞤣𞥆𞤭𞤲𞤣𞤫 𞤲'𞤣𞤫𞥅 𞤻𞤢𞤤𞤢𞥄𞤲𞤣𞤫 𞤧𞤵𞤩𞤮𞥅𞤲𞤣𞤫 𞤱𞤢𞤯𞤢𞤲𞤣𞤫 𞤻𞤢𞤤𞤢𞥄𞤲𞤣𞤫 𞤢𞤣𞤵𞤲𞤢𞤴𞤢𞤲𞤳𞤮𞥅𞤪𞤫 𞤲𞤺𞤢𞤥 𞤼𞤫𞤣𞥆𞤭𞤲𞤺𞤮𞤤 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫 𞤫 𞤢𞤣𞤵𞤲𞤢 𞤮𞥅 𞤳𞤢𞤤𞤢.
𞤐𞤺𞤢𞤤 𞤻𞤢𞤤𞥆𞤢𞤤 𞤸𞤭𞤲𞤮 𞤸𞤵𞥅𞤤𞤢𞤲𞤭 𞤢𞤲𞤣𞤭𞤲𞤼𞤭𞤲𞤺𞤮𞤤 𞤫 𞤪𞤫𞥅𞤲𞤵𞤺𞤮𞤤⹁ 𞤫 𞤰𞤫𞤤𞥆𞤭𞤲𞤼𞤭𞤲𞤣𞤫 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫 𞤫 𞤲𞤣𞤫𞤪 𞤱𞤭𞤲𞤣𞤫𞤪𞤫 𞤲𞤣𞤫𞤲 𞤬𞤮𞤱⹁ 𞤧𞤢𞤦𞤵 𞤳𞤢𞤤𞤢 𞤯𞤫𞤲𞤺𞤢𞤤⹁ 𞤸𞤭𞤲𞤮 𞤶𞤮𞤺𞤭𞥅 𞤨𞤭𞤲𞤢𞤤 𞤸𞤫𞥅𞤪𞤼𞤢𞤲𞤭𞥅𞤲𞤺𞤢𞤤 𞤯𞤵𞤥⹁ 𞤫 𞤬𞤭𞤲𞤢𞥄 𞤼𞤢𞤱𞤢𞥄 𞤥𞤵𞤲⹁ 𞤫 𞤴𞤭𞤴𞤢𞤲𞤣𞤫 𞤥𞤵𞤲 𞤸𞤫𞥅𞤪𞤼𞤭𞥅𞤲𞤣𞤫. 𞤧𞤭 𞤲𞤺𞤢𞤤 𞤥𞤢𞥄𞤴𞤭𞥅 𞤼𞤵𞤲 𞤯𞤫𞤲 𞤨𞤭𞤲𞤫 𞤫 𞤢𞤣𞤢𞥄𞤶𞤭 𞤥𞤢𞥄𞤴𞤮𞤪𞤢𞤴 𞤯𞤮𞤲⹁ 𞤧𞤢𞤦𞤵 𞤳𞤮 𞤯𞤫𞤲𞤺𞤢𞤤 𞤪𞤫𞥅𞤲𞤭 𞤨𞤭𞤲𞤢𞤤.
𞤤𞤵𞥅𞤼𞤮𞤲𞤣𞤭𞤪𞤢𞤤 𞤯𞤫𞤲𞤯𞤫⹁𞤥𞤢𞤤𞥆𞤢 𞤱𞤭𞤴𞤫𞤲 𞤯𞤵𞥅𞤯𞤵𞤺𞤮𞤤 𞤧𞤫𞤪𞤼𞤵𞤺𞤮𞤤 𞤯𞤫𞤲𞤯𞤫⹁ 𞤳𞤮 𞤸𞤵𞥅𞤲𞤣𞤫 𞤸𞤭𞤥𞥆𞤵𞤲𞤣𞤫⹁ 𞤫 (𞤲𞤣𞤵𞤲𞤵 𞤨𞤭𞤲𞤢𞤤 𞤲𞤫𞤯𞥆𞤢𞤲𞤳𞤢𞥄𞤺𞤢𞤤) patrimoine culturel de l'humanité.
𞤫 𞤳𞤢𞤣𞤭 𞤱𞤫𞤤𞤼𞤮𞤪𞤺𞤮𞤤 𞤲𞤺𞤢𞤤 𞤻𞤢𞤤𞥆𞤢𞤤 𞤳𞤮 𞤹𞤭𞤪𞥆𞤭𞤼𞤢𞤺𞤮𞤤 𞤸𞤭𞤼𞥆𞤵𞤺𞤮𞤤 𞤯𞤫𞤲𞤯𞤫 𞤥𞤫𞤲 𞤯𞤫𞤲⹁ 𞤫 𞤴𞤫𞤪𞤵: 𞤰𞤫𞤤𞥆𞤭𞤼𞤵𞤺𞤮𞤤 𞤯𞤫𞤲𞤯𞤫 𞤼𞤮𞤳𞤮𞥅𞤧𞤫⹁ 𞤫 𞤯𞤫𞤲𞤯𞤫 𞤳𞤭𞤯𞥆𞤫 𞤲𞤺𞤢𞤥𞤵 𞤸𞤢𞤩𞤢𞥄𞤣𞤫 𞤥𞤢𞤶𞥆𞤵𞤺𞤮𞤤 𞤯𞤫⹁ 𞤫 𞤥𞤵𞤤𞤵𞤺𞤮𞤤 𞤯𞤫⹁ 𞤸𞤵𞥅𞤲𞤣𞤫 𞤽𞤢𞥄𞤧𞤵𞤲𞤣𞤫 𞤵𞤶𞤵𞤲𞤫 𞤯𞤫𞤲𞤯𞤫 𞤫 𞤲𞤣𞤫𞤪 𞤱𞤭𞤲𞤣𞤫𞤪𞤫 𞤲𞤣𞤫𞤲 𞤸𞤢𞤲𞤣𞤫.
𞤉𞤲 𞤢𞤪𞤼𞤮𞤴𞤢𞤴 𞤫 𞤨𞤭𞥅𞤶𞤭 𞤯𞤭 𞤸𞤢𞥄𞤲𞤵𞤯𞤫𞤲 𞤱𞤢𞤯𞤵𞤣𞤫 𞤫 𞤲'𞤣𞤫𞥅 𞤻𞤢𞤤𞤢𞥄𞤲𞤣𞤫.
𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.
