𞤑𞤓𞤂𞤓𞥅 𞤃𞤀𞤎𞤋𞤐𞤋𞥅 𞤌𞤈𞤀𞤐𞤅𞤋 𞤃𞤌𞤐𞤋𞥅.

𞤐𞤣𞤫𞥅 𞤥𞤮𞤶𞤮𞤦𞤫𞤪𞤫 𞤸𞤫𞤧𞤪𞤫⹁ 𞤱𞤭𞤴𞤫𞤼𞤫𞥅𞤲𞤣𞤫 𞤳𞤵𞤤𞤵𞥅⹁ 𞤴𞤢𞤤𞤼𞤭𞤲𞤢𞤴𞤲𞤣𞤫 𞤥𞤵𞥅𞤯𞤭⹁ 𞤥𞤢𞤤𞥆𞤢 𞤲𞤢𞤩𞤢 𞤳𞤢𞤣𞤭 𞤲𞤦𞤵𞥅𞤯𞤭⹁ 𞤥𞤢𞤰𞤭𞤲𞤭𞥅 𞤮𞤪𞤢𞤲𞤧𞤭 𞤥𞤮𞤲𞤭𞥅⹁ 𞤧𞤢𞤦𞤵 𞤸𞤫𞥅𞤱𞤺𞤮𞤤 𞤣𞤭𞤤𞥆𞤢𞤲𞤣𞤫⹁ 𞤫 𞤣𞤭𞤥𞤦𞤵𞤺𞤮𞤤 𞤧𞤢𞤸𞤪𞤫 𞤳𞤮𞤲𞤢𞥄𞤳𞤭𞤪𞤭 𞤲𞤣𞤫𞤲.

𞤫 𞤲𞤣𞤫𞤪 𞤺𞤭𞤲𞤫 𞤼𞤫𞤲𞤼𞤭𞤲𞤭𞥅 𞤫 𞤲𞤣𞤫𞤪 𞤧𞤢𞤸𞤪𞤫 𞤳𞤮𞤲𞤢𞥄𞤳𞤭𞤪𞤭 𞤲𞤣𞤫𞤲⹁  𞤲𞤣𞤫𞥅 𞤭𞤲𞤣𞤫 𞤳𞤵𞤤𞤵𞥅 𞤲𞤮 𞤱𞤫𞤲𞤺𞤢𞥄 𞤫 𞤷𞤫𞤲𞤯𞤫 𞤬𞤮𞤱 𞤳𞤢 𞤲𞤣𞤫𞤪 𞤧𞤢𞤸𞤪𞤫 𞤸𞤢𞥄 𞤳𞤢 𞤧𞤫𞤪𞤢𞥄𞤪𞤭 𞤥𞤢𞤴𞤪𞤫.

𞤺𞤮𞤤𞥆𞤫 𞤥𞤢𞤩𞥆𞤫 𞤳𞤮 𞤲𞤢𞤩𞤵𞤺𞤮𞤤 𞤲𞤦𞤵𞥅𞤯𞤭⹁ 𞤦𞤢𞤲𞤽𞤫𞥅𞤶𞤭𞤯𞤭𞤲 𞤬𞤮𞤱 𞤫 𞤲𞤣𞤫𞤪 𞤢𞤬𞤪𞤭𞤳𞤭 𞤸𞤢𞥄 𞤼𞤫𞥅𞤪𞤼𞤢𞥄 𞤲𞤣𞤫𞤪 𞤺𞤭𞤲𞤫.
𞤩𞤵𞤪𞤭𞥅 𞤶𞤮𞤲𞤼𞤫 𞤯𞤭𞤯𞤭 𞤸𞤭𞤩𞤫 𞤰𞤫𞤼𞥆𞤭 𞤩𞤵𞤪𞤭 𞤴𞤭𞤥𞤩𞤫 𞤱𞤵𞤤𞤵𞥅𞤪𞤫 𞤳𞤮 𞤶𞤭𞤲𞤣𞤢 𞤫 𞤲𞤣𞤫𞤪 𞤧𞤢𞤸𞤪𞤫 𞤲𞤣𞤫𞤲⹁ 𞤲𞤺𞤢𞤥𞤵 𞤸𞤮𞤤𞥆𞤵𞤺𞤮𞤤 𞤴𞤭𞤥𞤩𞤫 𞤩𞤫𞤲 𞤳𞤮 𞤸𞤮𞤲𞥆𞤮 𞤲𞤣𞤫 𞤸𞤵𞥅𞤼𞤮𞤪𞤼𞤫𞥅⹁ 𞤳𞤢 𞤫𞤱𞤲𞤮𞤪𞤯𞤫.
𞤧𞤢𞤦𞤵 𞤲𞤮𞤲 𞤳𞤮 𞤸𞤵𞤲𞥆𞤢𞤲𞤣𞤫 𞤼𞤭𞤨𞥆𞤭𞤲𞤼𞤫𞥅𞤲𞤣𞤫 𞤳𞤢 𞤫𞤱𞤲𞤮𞤪𞤯𞤫 𞤢𞤲𞤣𞤪𞤮𞤴𞤭𞤣 𞤥𞤢𞤤𞥆𞤢 𞤢𞤴𞤬𞤮𞥅𞤲⹁ 𞤸𞤵𞤥𞤭𞤲𞤣𞤭𞤪𞤢𞥄 𞤬𞤭𞤩𞤲𞤣𞤫 𞤥𞤢𞥄𞤯𞤢 𞤲𞤣𞤫𞤲 𞤫 𞤪𞤢𞤽𞤢𞤥𞤫𞤪𞤫 𞤫𞤱𞤲𞤮𞤪𞤺𞤢𞤤 𞤥𞤢𞥄𞤯𞤢 𞤲𞤺𞤢𞤤 𞤱𞤮𞤲𞤣𞤵𞤣𞤫 𞤫 𞤳𞤮𞤲𞤺𞤵𞤤𞤮𞤤.

𞤩𞤫 𞤸𞤮𞤤𞥆𞤭𞥅 𞤲𞤶𞤮𞤩𞤲𞤣𞤭 𞤬𞤭𞥅 𞤴𞤢𞤤𞤼𞤭𞥅𞤲'𞤺𞤮𞤤 𞤲𞤦𞤵𞥅𞤯𞤭 𞤳𞤮 𞥑% 𞤯𞤵𞤲 𞤱𞤮𞤲𞤭 𞤧𞤭 𞤢 𞤲𞤢𞤩𞤢𞤲𞤭𞥅 𞤺𞤮𞤯𞥆𞤮 𞤲𞤦𞤵𞥅𞤯𞤭 𞤳𞤮 𞤯𞤭 𞤯𞤵𞥅𞤯𞤭 𞤱𞤮𞥅 𞥑𞥐𞥐.𞥐𞥐𞥐 𞤳𞤢𞤤𞤢 𞤳𞤮 𞥑.𞥐𞥐𞥐 𞤩𞤫 𞤰𞤫𞤼𞥆𞤢𞤼𞤢 𞤷𞤮𞤺𞥆𞤵 𞤴𞤢𞤤𞤼𞤭𞤲𞤺𞤮𞤤 𞤲𞤺𞤮𞤤.

𞤫𞤲 𞤢𞤲𞤣𞤭𞤲𞤼𞤭𞤲𞤢𞤴 𞤼𞤵𞤲 𞤺𞤭𞤦𞤭 𞤩𞤫 𞤲𞤮𞤣𞥆𞤭𞤼𞤭 𞤸𞤫𞤧𞤤𞤮𞥅𞤩𞤫 𞤩𞤫 𞤴𞤫𞤱𞤼𞤭 𞤬𞤭𞥅 𞤥𞤵𞤲⹁ 𞤳𞤮 𞤦𞤭𞤲𞤦𞤭 𞤲𞤣𞤫𞤲 𞤻𞤢𞤤𞤲𞤣𞤫 𞤮𞤪𞤢𞤲𞤧𞤭 𞤥𞤮𞤲𞤭𞥅 𞤯𞤵𞤴𞤼𞤭 𞤷𞤮𞤺𞥆𞤵 𞤴𞤢𞤤𞤼𞤭𞤲'𞤣𞤭𞤪𞤯𞤭 𞤥𞤵𞤲 𞤯𞤭𞤲⹁ 𞤩𞤫 𞤢𞤪𞤼𞤭𞤪𞤭 𞤳𞤢𞤥𞤩𞤫 𞤳𞤢𞤣𞤭 𞥑%.
𞤯𞤵𞤲 𞤫 𞤱𞤮𞤲𞤣𞤫 𞤺𞤮𞤤𞥆𞤮𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤥𞤢𞤤𞥆𞤢 𞤱𞤭𞤴𞤫𞤲 𞤸𞤵𞥅𞤱𞤮𞤲𞤣𞤭𞤪𞤢𞥄𞤩𞤫 𞤥𞤢𞤩𞥆𞤫 𞤩𞤫𞤲 pdv  𞤸𞤭𞤲𞤮 𞤧𞤢𞥄𞤼𞤭𞤲𞤭 𞤣𞤢𞤪𞤼𞤭𞤲𞤺𞤮𞤤 𞤺𞤮𞤤𞥆𞤫 𞤥𞤢𞤩𞥆𞤫 𞤯𞤫𞤲 grève. 𞤻𞤢𞤤𞤲𞤣𞤫 𞥒𞥙 𞤷𞤮𞤤𞤼𞤮 𞤧𞤢𞥄𞤼𞤭𞥅𞤲𞤣𞤫 𞤯𞤮𞥅⹁ 𞤧𞤢𞤦𞤵 𞤼𞤮𞤲𞤮𞥅𞤶𞤭 𞤥𞤢𞤩𞥆𞤫 𞤯𞤭𞤲 𞤳𞤮 𞤯𞤵𞤴𞤼𞤭𞥅 𞤳𞤮𞤲 𞤨𞤢𞤲𞤣𞤭.

𞤖𞤢𞤲𞤣𞤫 𞤻𞤢𞤤𞤲𞤣𞤫 𞥑𞥓 𞤷𞤮𞤤𞤼𞤮 𞥒𞥐𞥒𞥕 𞤩𞤫 𞤱𞤢𞤯𞤵𞤲𞤮 𞤶𞤭𞤥𞤣𞤵𞤪𞤵 𞤥𞤢𞤱𞤲𞤵𞤲𞤣𞤵 𞤳𞤢 𞤧𞤢𞤸𞤪𞤫 𞤳𞤮𞤲𞤢𞥄𞤳𞤭𞤪𞤭 𞤺𞤭𞤦𞤭 𞤳𞤢𞤤𞤵𞥅𞤥 𞤸𞤢𞥄 𞤳𞤢𞥄𞤦𞤫𞤤𞤫𞤲⹁ 𞤱𞤫𞤪𞤤𞤢𞥄𞤶𞤫 𞤩𞤢𞤣𞤮𞤼𞤮𞥅𞤯𞤫 𞥓𞥐 𞤫 𞤥𞤮𞤼𞤮𞥅𞤶𞤭 𞤩𞤢𞤣𞤲𞤢𞤴𞤯𞤭 𞥓𞥐𞥐 𞤸𞤢𞤪𞤭 𞤸𞤭𞤲𞤮 𞤴𞤢𞤤𞤼𞤭 𞤱𞤮𞤲𞤣𞤭 𞤫 𞤥𞤢𞤩𞥆𞤫 𞤸𞤭𞤲𞤮 𞤢𞤲𞤣𞤭𞤲𞤼𞤭𞤲𞤢 𞤳𞤮 𞤸𞤮𞤲𞥆𞤮 𞤸𞤵𞤲𞥆𞤢𞤲𞤣𞤫 𞤥𞤢𞤩𞥆𞤫 𞤲𞤣𞤫𞤲 𞤸𞤵𞥅𞤼𞤮𞤪𞤼𞤫𞥅.

𞤐𞤣𞤫𞥅 𞤥𞤮𞤶𞤮𞤦𞤫𞤪𞤫 𞤳𞤵𞤤𞤵𞥅 𞤱𞤮𞥅 𞤳𞤮 𞤲𞤣𞤫𞥅 𞤥𞤮𞤶𞤮𞤦𞤫𞤪𞤫 𞤭𞤲𞤣𞤭𞤴𞤫𞤲𞤩𞤫🇮🇳 𞤶𞤫𞤴𞤭𞤲𞤣𞤫 TOPAZ⹁ 𞤳𞤮𞤲𞤮 𞤲𞤺𞤢𞤤 𞤳𞤵𞤥𞤨𞤭𞤼𞤢𞤤 𞤯𞤮𞤲 𞤤𞤢𞥄𞤩𞤢𞤲𞤢𞥄𞤤𞤭 𞤤𞤢𞤥 𞤨𞤮𞤧.

𞤱𞤭𞤴𞤢𞥄𞤥𞤢 𞤳𞤢𞤣𞤭 𞤳𞤮𞤲𞤺𞤮𞤤 𞤑𞤓𞤂𞤓𞥅 𞤳𞤮 𞤫 𞤧𞤮𞥅𞤧𞤮 𞤰𞤫𞤼𞥆𞤢𞥄 𞤯𞤵𞤲 𞤬𞤭𞤪𞤼𞤭 : 𞤲𞤦𞤵𞥅𞤯𞤭 𞤥𞤢𞤤𞥆𞤢 𞤷𞤫𞤱𞤯𞤭⹁ 𞤯𞤵𞤲𞤯𞤮𞥅 𞤳𞤮 𞤳𞤢 𞤲𞤺𞤫𞥅𞤼𞤵 𞤸𞤫𞤩𞥆𞤭𞤼𞤢𞥄𞤲𞤺𞤵 𞤥𞤭 𞤫𞤺𞥆𞤭 𞤤𞤢𞥄𞤩𞤢𞤲𞤢𞥄𞤤𞤭 𞤤𞤢𞤥 𞤨𞤮𞤧.

𞤇𞤫 𞤬𞤵𞤯𞥆𞤢𞥄𞤳𞤭 𞤼𞤢𞤱𞤮 𞤺𞤮𞤤𞥆𞤵𞤣𞤫⹁ 𞤳𞤮𞤲𞤮 𞤸𞤭𞤲𞤮 𞤼𞤢𞤥𞤰𞤭𞤲𞤢𞥄 𞤳𞤮 𞤩𞤫 𞤬𞤵𞤯𞥆𞤮𞥅⹁ 𞤫 𞤴𞤮𞤲𞤼𞤫𞤪𞤫 𞤢𞤪𞤮𞥅𞤪𞤫.



𞤔𞤉𞤐𞥆𞤉 𞤁𞤌𞤘𞤓𞤅𞤀𞤂𞤋.