#𞤕𞤉𞤂𞥆𞤀𞤂 🦠🇨🇩|•• 𞤉𞤄𞤌𞤂𞤀𞥄 𞤊𞤉𞥅𞤙𞤋𞤚𞤋𞥅 𞤐𞤁𞤉𞤐𞤁𞤋 𞤁𞤋𞥅𞤅𞤌𞤁𞤀𞥄𞤈𞤋 𞤑𞤌𞤐𞤘𞤌
𞤒𞤭𞥅𞤤𞤭𞤪𞤣𞤫 𞤀𞤬𞤪𞤭𞤳𞤲𞤢𞥄𞤪𞤫 𞤬𞤭𞥅 𞤖𞤭𞥅𞤻𞤢𞤲𞤣𞤫 𞤫 𞤔𞤫𞥅𞤪𞤼𞤭𞤲𞤢𞤲𞤣𞤫 𞤙𞤢𞤦𞥆𞤵𞥅𞤤𞤭⹁ 𞤷𞤢𞤼𞤢𞤤 𞤢𞤬𞤪𞤭𞤲𞤳𞤢𞥄𞤱𞤢𞤤 𞤼𞤫𞤽𞤼𞤵𞤲𞥋𞤺𞤮𞤤 𞤬𞤭𞥅 𞤷𞤫𞤤𞥆𞤢𞤤⹁ 𞤸𞤮𞤤𞥆𞤭𞤼𞤭𞥅 𞤸𞤢𞤲𞤣𞤫 𞤫 𞤃𞤢𞤱𞤲𞤣𞤫⹁ 𞤻𞤢𞤤𞤲𞤣𞤫 𞥑𞥕 𞤣𞤵𞥅𞤶𞤮 𞥒𞥐𞥒𞥖⹁ 𞤱𞤮𞤲𞤣𞤫𞤥𞤢 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤺𞤵𞤲 𞤱𞤵𞤪𞤼𞤭𞤳𞤫 𞤫 𞤐𞤁𞤫𞤲𞤣𞤭 𞤁𞤭𞥅𞤧𞤮𞤣𞤢𞥄𞤪𞤭 𞤑𞤮𞤲𞤺𞤮 𞤲𞤣𞤭𞤲. 𞤑𞤮 𞤫 𞤬𞤢𞤤𞤲𞤣𞤫 𞤱𞤭𞤴𞤫𞤼𞤫𞥅𞤲𞤣𞤫 𞤋𞤼𞤵𞤪𞤭⹁ 𞤱𞤮𞤲𞤼𞤭𞤪𞤲𞤺𞤮 𞤬𞤵𞤯𞤲𞤢𞥄𞤲𞤺𞤫 𞤐𞤢𞤲𞤮⹁ 𞤳𞤢 𞤳𞤫𞥅𞤪𞤮𞤤 𞤓𞤺𞤢𞤲𞤣𞤢𞥄 𞤫 𞤅𞤵𞤣𞤢𞥄𞤲 𞤙𞤢𞥄𞤥𞤲𞤢𞥄𞤲𞤺𞤫.
𞤉 𞤱𞤭𞤴𞤭 𞤶𞤮𞤲𞤯𞤭 𞤢𞤪𞤢𞤲𞤭 𞤯𞤭 𞤴𞤭𞥅𞤤𞤭𞤪𞤣𞤫 𞤲𞤣𞤫𞤲 𞤸𞤮𞤤𞥆𞤭𞤼𞤭⹁ 𞤼𞤢𞤦𞤭𞤲𞤼𞤭𞤲𞤢𞥄𞤥𞤢 𞤫 𞤱𞤭𞤯𞤼𞤭𞤪𞤣𞤫 𞤱𞤮𞤲𞤣𞤫𞤥𞤢 𞤳𞤮 𞤬𞤢𞤥𞤯𞤭 𞤱𞤮𞥅 𞤲𞤢𞤴𞤮 𞤥𞤢𞥄𞤴𞤭𞤪𞤩𞤫 𞤻𞤢𞥄𞤱𞤵 𞤲𞤺𞤵𞤲. 𞤚𞤫𞤤𞤫𞤲 𞤧𞤮𞤺𞤭𞤼𞤢𞥄𞤩𞤫 𞥒𞥔𞥖⹁ 𞤫 𞥖𞥕 𞤥𞤢𞥄𞤴𞤵𞤩𞤫⹁ 𞤧𞤫𞤤𞤬𞤢𞥄𞤥𞤢 𞤫 𞤷𞤢𞤸𞤫 𞤮𞥅𞤺𞤭𞤪𞤤𞤫 𞤃𞤮𞤲𞤺𞤵𞤱𞤢𞤤𞤵 𞤫 𞤈𞤵𞤱𞤢𞤥𞤨𞤢𞤪𞤢. 𞤚𞤫𞤤𞤫𞤲 𞤴𞤭𞤥𞤩𞤫 𞥑𞥕𞥐 𞥐𞥐𞥐 𞤲𞤮 𞤸𞤮𞤯𞤭 𞤫 𞤧𞤢𞤸𞤪𞤫 𞤦𞤫𞥅. 𞤑𞤮 𞤫 𞤤𞤫𞤱𞤪𞤵 𞤬𞤫𞤰𞥆𞤵𞤲𞥋𞤣𞤵 𞤧𞤮𞤺𞤭𞤼𞤢𞥄𞤩𞤫 𞤢𞤪𞤢𞤥𞤩𞤫 𞤩𞤫𞤲 𞤧𞤫𞤤𞤬𞤢𞥄.
𞤚𞤢𞤧𞤳𞤢𞤲𞤯𞤫 𞤱𞤢𞤯𞤢𞥄𞤯𞤫 𞤯𞤫𞤲 𞤑𞤭𞤲𞥃𞤢𞤧𞤢𞥄⹁ 𞤱𞤢𞤤𞥆𞤭𞤼𞤭𞤳𞤫 𞤼𞤢𞤻𞥆𞤵𞤺𞤮𞤤 𞤱𞤮𞥅𞤣𞤢𞤲𞤣𞤫 𞤲𞤺𞤭𞤤𞤳𞤵 𞤲𞤺𞤵𞤲 𞤫 𞤲𞤣𞤫𞤪 𞤷𞤵𞥅𞤼𞤫 𞥑𞥓 𞤫 𞤲𞤣𞤫𞤪 𞥒𞥐 𞤱𞤭𞤣𞤢𞥄𞤯𞤫 𞤯𞤫𞤲. 𞤘𞤢𞤧𞤵𞤲𞤯𞤫 𞤼𞤫𞤬𞤢𞤲𞤯𞤫 𞤨𞤮𞤼𞥆𞤭𞤲𞤭𞥅 𞤣𞤢𞤰𞥆𞤫𞤪𞤫 𞤟𞤢𞥄𞤴𞤪 𞤲𞤣𞤫𞤲⹁ 𞤻𞤢𞤱𞤵 𞤱𞤢𞤪𞤵𞤲𞤮𞥅𞤲𞤺𞤵 𞥔𞥕 𞤪𞤮𞤱𞤢𞤲𞤭 𞤑𞤢𞤧𞤢𞥄𞤴.
𞤂𞤢𞥄𞤥𞤩𞤫 𞤓𞤺𞤢𞤲𞤣𞤢𞥄 𞤩𞤫𞤲 𞤼𞤢𞤦𞤭𞤲𞤼𞤭𞤲𞤭𞥅 𞤸𞤢𞤲𞤣𞤫 𞤧𞤮𞤺𞤭𞤼𞤢𞥄𞤯𞤮 𞤉𞤦𞤮𞤤𞤢𞥄 𞤭𞤱𞤪𞤵𞤯𞤮 𞤮𞤲 𞤑𞤮𞤲𞤺𞤮. 𞤔𞤢𞥄𞤺𞤮𞤪𞤺𞤢𞤤 𞤲𞤺𞤢𞤤 𞤳𞤢 𞤷𞤫𞤤𞥆𞤢𞤤 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤥𞤢𞤱𞤯𞤮 𞤥𞤮 𞤣𞤵𞥅𞤩𞤭 𞥕𞥙 𞤥𞤢𞥄𞤴𞤵𞤯𞤮 𞤫 𞤐𞤢𞥄𞤧𞤢𞥄𞤲𞤣𞤫⹁ 𞤸𞤢𞤪𞤭 𞤲𞤮 𞤱𞤮𞤲𞤣𞤭 𞤫 𞤥𞤢𞤺𞥆𞤵.
𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥗𞥖 𞤲𞤺𞤵 𞤬𞤫𞥅𞤻𞤭 𞤢𞤪𞤢𞤲𞤵𞤲 𞤫 𞤲𞤣𞤭𞥅 𞤤𞤫𞤧𞤣𞤭 𞤱𞤭𞤴𞤫𞤼𞤫𞥅𞤲𞤣𞤭 𞤸𞤢𞤲𞤣𞤫 𞤐𞤁𞤫𞤲𞤣𞤭 𞤁𞤭𞥅𞤧𞤮𞤣𞤢𞥄𞤪𞤭 𞤑𞤮𞤲𞤺𞤮. 𞤑𞤮 𞥑𞥗𞤩𞤵𞤲 𞤯𞤵𞤲 𞤲𞤭𞥅 𞤲𞤺𞤵 𞤬𞤫𞥅𞤻𞤵𞤣𞤫 𞤫 𞤲𞤣𞤭𞥅 𞤤𞤫𞤧𞤣𞤭.
❓📘 𞤂𞤢𞤲𞤣𞤫 𞤶𞤮𞤤𞤯𞤫 𞤬𞤭𞥅 𞤫𞤦𞤮𞤤𞤢𞥄
𞤸𞤮𞤤 𞤳𞤮 𞤱𞤮𞤲𞤭 𞤲𞤺𞤭𞤤𞤳𞤵 𞤉𞤦𞤮𞤤𞤢𞥄؟
𞤙𞤢𞤱𞤵-𞤉𞤦𞤮𞤤𞤢𞥄 𞤲𞤺𞤵𞤲 𞤳𞤮 𞤻𞤢𞤱𞤵 𞤼𞤭𞥅𞤯𞤵𞤲𞥋𞤺𞤵 𞤪𞤢𞥄𞤩𞤢𞤴𞤲𞤺𞤵 𞤴𞤭𞤥𞤩𞤫 𞤫 𞤳𞤵𞤤𞥆𞤭 (𞤦𞤢𞥄𞤯𞤭) 𞤸𞤫𞤩𞤮𞤪𞤢𞤴𞤲𞤺𞤵 𞤲𞤺𞤭𞤤𞤳𞤵 𞤱𞤭𞤴𞤫𞤼𞤫𞥅𞤲𞤺𞤵 𞤉𞤦𞤮𞤤𞤢𞥄. 𞤐𞤘𞤵𞥅 𞤻𞤢𞤱𞤵 𞤪𞤢𞥄𞤩𞤢𞤴 𞤲𞤮 𞤴𞤢𞥄𞤱𞤭𞤪𞤭⹁ 𞤲𞤺𞤵 𞤱𞤢𞤪𞤢𞤴 𞤳𞤢𞤣𞤭 𞤲𞤮 𞤴𞤢𞥄𞤱𞤭𞤪𞤭 𞤑𞤌𞤐𞤌 𞤲𞤮 𞤲𞤫𞤱𞤮𞥅 𞤳𞤢 𞤲𞤺𞤵 𞤬𞤢𞤣𞥆𞤫𞥅.
𞤖𞤮𞤤 𞤲𞤮 𞤲𞤺𞤵 𞤶𞤢𞥄𞤤𞤮𞤪𞤼𞤢؟
𞤌𞥅𞤺𞤭𞤪𞤣𞤫 𞤲𞤺𞤭𞤤𞤳𞤵 𞤲𞤺𞤵𞤲 𞤢𞤲𞤣𞤢𞥄𞤳𞤢. 𞤐𞤮 𞤲𞤺𞤵 𞤬𞤫𞥅𞤻𞤭𞤪𞤭 𞤫 𞤴𞤭𞤥𞤩𞤫 𞤩𞤫𞤲 𞤳𞤢 𞤢𞤪𞤢𞤲𞤣𞤫⹁ 𞤢𞤲𞤣𞤢𞥄𞤳𞤢 𞤳𞤢𞤣𞤭. 𞤑𞤮 𞤸𞤢𞤧𞤭𞥅 𞤳𞤮𞤲⹁ 𞤸𞤢𞤪𞤢𞤴 𞤲𞤫𞤯𞥆𞤮 𞤥𞤮 𞤲𞤺𞤵 𞤢𞤣𞤮𞤼𞤮𞥅 𞤮𞤲 𞤪𞤢𞥄𞤩𞤵𞤣𞤫⹁ 𞤼𞤢𞤳𞥆𞤮𞤲𞥋𞤣𞤭𞤪 𞤫 𞤳𞤵𞤤𞥆𞤭 𞤻𞤢𞤱𞤵𞤯𞤭.
𞤒𞤭𞤥𞤩𞤫 𞤲𞤮 𞤪𞤢𞥄𞤩𞤭𞤪𞤢 𞤲𞤺𞤵𞥅 𞤻𞤢𞤱𞤵 𞤧𞤭 𞤩𞤫 𞤼𞤢𞤳𞥆𞤮𞤲𞥋𞤣𞤭𞤪𞤭𞥅 𞤫 𞤧𞤫𞤤𞤦𞤢𞤲 𞤴𞤵𞤨𞥆𞤮𞤼𞤮𞥅𞤯𞤢𞤲 𞤫 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮⹁ 𞤱𞤢𞤲𞤮 𞤰𞤭𞥅𞤰𞤢𞤲⹁ 𞤼𞤵𞥅𞤼𞤢⹁ 𞤦𞤵𞤼𞥆𞤭⹁ 𞤷𞤮𞥅𞤬𞤫⹁ 𞤤𞤢𞤳𞥆𞤫𞤪𞤫⹁ 𞤫𞤳𞤲𞤯.
𞤐𞤘𞤵𞥅 𞤻𞤢𞤱𞤵 𞤲𞤮 𞤶𞤢𞥄𞤤𞤮𞤪𞤢 𞤥𞤫𞥅𞤥𞤵𞤺𞤮𞤤 𞤨𞤭𞥅𞤶𞤭 𞤥𞤮𞤣𞥆𞤵𞤯𞤭 𞤱𞤢𞤲𞤮 𞤥𞤫𞤧𞤫𞤤𞥆𞤫.
𞤑𞤮 𞤸𞤢𞤳𞥆𞤵𞤲𞥋𞤣𞤫 𞤦𞤢𞥄𞤤𞤯𞤫 𞥒 𞤫 𞤦𞤢𞥄𞤤𞤯𞤫 𞥑𞥒 𞤲𞤺𞤵 𞤱𞤮𞥅𞤬𞤮𞤼𞤮𞥅.
𞤖𞤮𞤤 𞤳𞤮 𞤱𞤮𞤲𞤭 𞤥𞤢𞥄𞤲𞤣𞤫𞥅𞤶𞤭 𞤥𞤢𞤺𞥆𞤵؟
• 𞤔𞤮𞤲𞤼𞤫
• 𞤚𞤵𞥅𞤪𞤫
• 𞤕𞤢𞤪𞤼𞤮𞤤 𞤥𞤢𞥄 𞤣𞤮𞤺𞤵 𞤪𞤫𞥅𞤣𞤵
• 𞤙𞤢𞥄𞤯𞤵𞤺𞤮𞤤 𞤳𞤮𞤲𞤮𞤲𞥋𞤣𞤮𞤤
• 𞤃𞤵𞥅𞤧𞤵 𞤶𞤮𞤳𞥆𞤵𞤤𞤫
• 𞤃𞤵𞥅𞤧𞤵 𞤪𞤫𞥅𞤣𞤵
• 𞤃𞤵𞥅𞤧𞤵 𞤸𞤮𞤸𞤪𞤫
• 𞤊𞤫𞤯𞥆𞤵𞤺𞤮𞤤 𞤩𞤢𞤤𞤲𞤣𞤵 𞤲𞤣𞤵𞤲 𞤱𞤢 𞤧𞤭 𞤮𞤲𞤼𞤭𞤺𞤭 𞤳𞤮 𞤬𞤫𞤼𞤢𞥄𞤯𞤮
• 𞤑𞤫𞤲𞤫𞤲⹁ 𞤲𞤮 𞤴𞤭𞤴𞤫𞥅 𞤫 𞤴𞤭𞤥𞤩𞤫 𞤩𞤫 𞤲𞤺𞤵 𞤪𞤢𞥄𞤩𞤭: 𞤊𞤵𞤻𞥆𞤵𞤺𞤮𞤤⹁ 𞤱𞤮𞤶𞥆𞤵𞤺𞤮𞤤 𞤺𞤭𞤴𞤼𞤫⹁ 𞤤𞤭𞤰𞥆𞤫𞤪𞤫 𞤫 𞤼𞤵𞤰𞥆𞤭𞤪𞤺𞤮𞤤 𞤦𞤵𞤣𞥆𞤫 𞤩𞤢𞤤𞤲𞤣𞤵.
🛡️ 𞤖𞤮𞤤 𞤲𞤮 𞤲𞤺𞤵 𞤬𞤢𞤣𞥆𞤮𞤪𞤼𞤫𞥅؟
• 𞤑𞤮 𞤩𞤮𞤪𞤲𞤢𞤺𞤮𞤤 𞤤𞤮𞥅𞤧𞤮𞤤⹁ 𞤫 𞤺𞤭𞥅𞤪𞤯𞤫⹁ 𞤩𞤮𞤪𞤲𞤮𞥅 𞤹𞤵𞤬𞥆𞤮𞤤 𞤲𞤺𞤢𞤥 𞤱𞤮𞤯𞤢𞤺𞤮𞤤 𞤼𞤢𞤳𞥆𞤮𞤲𞥋𞤣𞤭𞤪𞤢𞤤 𞤫 𞤧𞤫𞤤𞤦𞤢𞤲 𞤴𞤢𞤤𞤼𞤢𞤴𞤯𞤢𞤲 𞤫 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮 𞤉𞤦𞤮𞤤𞤢𞥄 𞤥𞤢𞥄 𞤥𞤢𞥄𞤴𞤭𞤪𞤯𞤮 𞤉𞤦𞤮𞤤𞤢𞥄.
• 𞤑𞤢𞤤𞤢 𞤧𞤮𞤺𞤭𞤼𞤢𞥄𞤯𞤮 𞤲𞤮 𞤱𞤮𞤲𞤣𞤭 𞤫 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤺𞤵𞤲⹁ 𞤲𞤮 𞤸𞤢𞥄𞤲𞤢𞥄 𞤲𞤢𞤩𞤫𞥅𞤣𞤫 𞤳𞤭𞤧𞤢𞤲 𞤳𞤢 𞤻𞤢𞤱𞤲𞤣𞤭𞤪𞤣𞤵 𞤩𞤵𞤪𞤲𞤣𞤵 𞤩𞤢𞤣𞤢𞥄𞤣𞤫. 𞤒𞤭𞤥𞤩𞤫 𞤶𞤭𞤤𞥆𞤮𞤲𞤣𞤭𞤪𞤩𞤫 𞤫 𞤻𞤢𞤱𞤵𞤯𞤮 𞤮𞤲 𞤲𞤮 𞤸𞤢𞥄𞤲𞤢𞥄 𞤯𞤢𞤩𞥆𞤭𞤼𞤫𞥅𞤣𞤫⹁ 𞤰𞤫𞥅𞤱𞤼𞤫𞥅⹁ 𞤪𞤫𞤬𞤼𞤭 𞤩𞤫 𞤢𞤴𞤲𞤭𞤼𞤫𞥅 𞤲𞤮 𞤼𞤫𞤲𞤼𞤭𞤪𞤭.
• 𞤒𞤭𞤥𞤩𞤫 𞤥𞤢𞥄𞤴𞤭𞤪𞤩𞤫 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤺𞤵𞤲 𞤸𞤢𞥄𞤲𞤢𞥄𞤳𞤢 𞤥𞤫𞥅𞤥𞤫𞥅𞤣𞤫 𞤧𞤭 𞤱𞤮𞤲𞤢𞥄 𞤱𞤮𞤲𞤣𞤵𞤣𞤫 𞤫 𞤩𞤮𞤪𞤲𞤢𞤼𞤫𞥅𞤶𞤭 𞤣𞤢𞤯𞤭𞤼𞤮𞤪𞤯𞤭 𞤴𞤫𞤯𞥆𞤵𞤯𞤭⹁ 𞤩𞤫 𞤵𞤦𞥆𞤫𞥅 𞤳𞤢𞤣𞤭 𞤲𞤮 𞤴𞤢𞥄𞤱𞤭𞤪𞤭.
• 𞤅𞤢𞤬𞤪𞤮𞤪𞤣𞤫 𞤩𞤵𞤪𞤲𞤣𞤫 𞤩𞤢𞤣𞤢𞥄𞤣𞤫 𞤲𞤣𞤫𞤲 𞤲𞤮 𞤸𞤢𞥄𞤲𞤢𞥄 𞤢𞤲𞤣𞤭𞤲𞤫𞥅𞤣𞤫 𞤬𞤭𞥅 𞤩𞤫𞤲 𞤧𞤮𞤺𞤭𞤼𞤢𞥄𞤩𞤫 𞤲𞤮 𞤱𞤮𞤲𞤣𞤭 𞤫 𞤉𞤦𞤮𞤤𞤢𞥄.
• 𞤅𞤮𞤺𞤭𞤼𞤢𞥄𞤩𞤫 𞤲𞤮 𞤱𞤮𞤲𞤣𞤭 𞤫 𞤉𞤦𞤮𞤤𞤢𞥄 𞤲𞤮 𞤸𞤢𞥄𞤲𞤢𞥄 𞤼𞤫𞤤𞤲𞤫𞥅𞤣𞤫 𞤱𞤢𞤤𞥆𞤢 𞤱𞤫𞤣𞥆𞤭𞤲𞤫𞥅. 𞤇𞤫 𞤼𞤮𞤨𞥆𞤭𞤼𞤫𞥅 𞤫 𞤩𞤢𞥄𞤱𞤮 𞤸𞤫𞥅𞤣𞤮.
• 𞤘𞤮𞤤𞥆𞤢𞤴𞤩𞤫 𞤫 𞤻𞤢𞤱𞤲𞤣𞤮𞤪𞤯𞤫 𞤯𞤫𞤲 𞤬𞤮𞤬⹁ 𞤲𞤮 𞤸𞤢𞥄𞤲𞤢𞥄 𞤢𞤲𞤣𞤭𞤲𞤫𞥅𞤣𞤫 𞤧𞤭𞤬𞤢𞥄𞤶𞤭 𞤲𞤺𞤵𞥅 𞤻𞤢𞤱𞤵 𞤫 𞤦𞤮𞤤𞤭 𞤶𞤢𞥄𞤤𞤮𞤪𞤯𞤭 𞤥𞤢𞤺𞥆𞤵. 𞤉𞤩𞤫 𞤸𞤢𞥄𞤲𞤢𞥄 𞤼𞤫𞤲𞤼𞤭𞤲𞤢𞤲𞤫𞥅𞤣𞤫 𞤪𞤫𞥅𞤲𞤢𞤺𞤮𞤤 𞤬𞤫𞤱𞤲𞤣𞤮 𞤳𞤵𞥅𞤯𞤫 𞤪𞤵𞤺𞥆𞤭𞥅𞤯𞤫 𞤱𞤢𞤲𞤮 𞤷𞤵𞤳𞥆𞤵𞤺𞤮𞤤⹁ 𞤥𞤢𞥄 𞤯𞤵𞤲 𞤶𞤭𞥅𞤩𞤵𞤺𞤮𞤤 𞤰𞤭𞥅𞤰𞤢𞤲 𞤥𞤢𞤤𞥆𞤢 𞤳𞤮 𞤴𞤵𞤨𞥆𞤮𞤼𞤮𞥅 𞤫 𞤩𞤢𞤤𞤲𞤣𞤵 𞤲𞤫𞤯𞥆𞤮 𞤮𞤲⹁ 𞤱𞤢𞤤𞥆𞤢 𞤼𞤵𞤥𞤨𞤢𞥄𞤪𞤵 𞤷𞤮𞥅𞤬𞤫 𞤫 𞤢𞥄𞤤𞤢𞤸𞤮𞤴 𞤧𞤭𞥅𞤩𞤮𞤪𞤳𞤮𞤴. 𞤑𞤢𞤤𞤢 𞤺𞤮𞤤𞥆𞤢𞤴𞤯𞤮 𞤫 𞤻𞤢𞤱𞤲𞤣𞤮𞤪𞤯𞤫 𞤲𞤮 𞤸𞤢𞥄𞤲𞤣𞤭 𞤫 𞤤𞤮𞥅𞤧𞤮𞤤⹁ 𞤫 𞤹𞤵𞤬𞥆𞤮𞤤 𞤫 𞤤𞤫𞤥𞤦𞤵 𞤳𞤢𞤻𞤵𞤲 𞤫 𞤺𞤭𞥅𞤪𞤯𞤫. 𞤀𞥄𞤤𞤢𞥄𞤶𞤭 𞤣𞤢𞤯𞤭𞤼𞤮𞤪𞤯𞤭⹁ 𞤯𞤭 𞤸𞤢𞤱𞤳𞤫𞤼𞤢𞥄𞤳𞤫 𞤯𞤭𞤲 𞤲𞤮 𞤸𞤢𞥄𞤲𞤢𞥄 𞤤𞤢𞤩𞥆𞤭𞤲𞤫𞥅𞤣𞤫 𞤬𞤮𞤼𞤢 𞤧𞤭 𞤯𞤭 𞤸𞤵𞥅𞤱𞤼𞤮𞤪𞤫𞥅 𞤳𞤢𞤣𞤭.
• 𞤐𞤘𞤵𞥅 𞤻𞤢𞤱𞤵 𞤲𞤮 𞤶𞤢𞥄𞤤𞤮𞤪𞤢 𞤥𞤫𞥅𞤥𞤵𞤺𞤮𞤤 𞤤𞤭𞤲𞤷𞤫 𞤥𞤢𞤤𞥆𞤢 𞤷𞤵𞤯𞤢𞥄𞤶𞤭 𞤣𞤢𞤲𞤳𞤭 𞤻𞤢𞤱𞤵𞤯𞤮 𞤮𞤲. 𞤍𞤭𞤲 𞤲𞤮 𞤸𞤢𞥄𞤲𞤢𞥄 𞤤𞤢𞤩𞥆𞤭𞤲𞤫𞥅𞤣𞤫 𞤧𞤭 𞤯𞤭 𞤸𞤵𞥅𞤱𞤼𞤮𞤪𞤫𞥅 𞤳𞤢𞤣𞤭.
• 𞤐𞤮 𞤱𞤢𞤯𞥆𞤭𞥅 𞤳𞤮𞤯𞤮𞥅𞤤𞤭⹁ 𞤯𞤭 𞤻𞤢𞤱𞤵 𞤉𞤦𞤮𞤤𞤢𞥄 𞤲𞤢𞥄𞤼𞤭 𞤫 𞤥𞤵𞤵𞤲⹁ 𞤢𞤲𞤣𞤭𞤲𞤺𞤮𞤤 𞤴𞤭𞤥𞤩𞤫 𞤩𞤫𞤲 𞤧𞤭𞤬𞤢𞥄𞤶𞤭 𞤥𞤢𞤺𞥆𞤵 𞤫 𞤫𞤩𞥆𞤮𞥅𞤶𞤫 𞤸𞤫𞤻𞥆𞤭𞤪𞤯𞤫 𞤲𞤺𞤵⹁ 𞤱𞤢𞤲𞤮 𞤲𞤮 𞤥𞤢𞥄𞤴𞤩𞤫 𞤩𞤫𞤲 𞤵𞤦𞥆𞤭𞤪𞤼𞤫𞥅. 𞤃𞤢𞥄𞤴𞤭𞤪𞤩𞤫 𞤉𞤦𞤮𞤤𞤢𞥄 𞤲𞤮 𞤸𞤢𞥄𞤲𞤢𞥄 𞤵𞤦𞥆𞤫𞥅𞤣𞤫 𞤲𞤮 𞤴𞤢𞥄𞤱𞤭𞤪𞤭 𞤫 𞤸𞤮𞥅𞤪𞤫 𞤳𞤭𞤧𞤢𞤤.
𞤚𞤢𞤳𞥆𞤮𞤲𞥋𞤣𞤭𞤪𞤩𞤫 𞤩𞤫
• 𞤐𞤁𞤫 𞤼𞤢𞤱𞤵𞤲𞤮𞥅 𞤳𞤮 𞤥𞤫𞥅𞤥𞤵𞤺𞤮𞤤 𞤰𞤭𞥅𞤰𞤢𞤲 𞤥𞤢𞥄𞤯𞤵𞤲 𞤳𞤮 𞤴𞤵𞤨𞥆𞤮𞤼𞤮𞥅 𞤫 𞤩𞤢𞤤𞤲𞤣𞤵 𞤻𞤢𞤱𞤵𞤯𞤮 𞤱𞤮𞤲𞤭 𞤢𞤪𞤢𞤲𞤣𞤫 𞤫 𞤳𞤮 𞤪𞤢𞥄𞤩𞤭𞤲𞤼𞤢 𞤲𞤺𞤵𞥅 𞤻𞤢𞤱𞤵⹁ 𞤲𞤮 𞤱𞤢𞤯𞥆𞤭 𞤪𞤫𞥅𞤲𞤵𞤺𞤮𞤤 𞤴𞤭𞤥𞤩𞤫 𞤧𞤮𞤷𞥆𞤮𞤲𞥋𞤣𞤭𞤪𞤩𞤫 𞤫 𞤻𞤢𞤱𞤵𞤯𞤮 𞤉𞤦𞤮𞤤𞤢𞥄. 𞤐𞤘𞤵𞤤𞤫𞥅𞤳𞤭 𞤩𞤢𞤤𞥆𞤭 𞤥𞤢𞤩𞥆𞤫 𞤯𞤭𞤲 𞤰𞤫𞥅𞤱𞤼𞤫𞥅 𞤤𞤢𞥄𞤦𞤭 𞤯𞤭𞤯𞤭 𞤫 𞤲𞤣𞤫𞤪 𞤻𞤢𞤤𞥆𞤢𞤤 𞤲𞤺𞤢𞤤. 𞤐𞤁𞤫 𞤶𞤮𞤲𞤼𞤫 𞤬𞤫𞥅𞤻𞤭𞤪𞤭 𞤫 𞤥𞤢𞤩𞥆𞤫⹁ 𞤫𞤩𞤫 𞤸𞤢𞥄𞤲𞤢𞥄 𞤱𞤢𞤤𞥆𞤭𞤲𞤫𞥅𞤣𞤫 𞤼𞤫𞤤𞤲𞤫𞥅 𞤳𞤢 𞤧𞤢𞤬𞤪𞤮𞤪𞤣𞤫 𞤳𞤭𞤧𞤢𞤲.
𞤕𞤉𞤈𞤐𞤌 𞤋𞤅𞤃𞤀𞥄𞤋𞥅𞤂𞤀 𞤔𞤀𞤂𞥆𞤌.
