𞤚𞤀𞤃𞤄𞤀𞥄 𞤔𞤢𞤳𞤢𞤪𞤭 𞤥𞤭𞤤𞤭𞤥𞤮𞤲𞤮𞥅 𞤸𞤫𞤧𞤤𞤮𞥅𞤱𞤮 𞤤𞤮𞤤𞥆𞤵𞤯𞤮 𞤳𞤢 𞤳𞤭𞤦𞤭𞤪𞤺𞤢𞤤 𞤫 𞤳𞤢 𞤰𞤫𞤱𞤤𞤮𞤱𞤢𞤤 𞤫𞤧𞤨𞤢𞥄𞤧 𞤫𞤬 𞤫𞤥⹁ 𞤱𞤢𞤴𞤲𞤭𞤼𞤭𞤳𞤫 𞤺𞤮𞤤𞥆𞤭𞤣𞤭𞥅𞤩𞤫 𞤥𞤵𞤲 𞤸𞤢𞥄 𞤸𞤫𞤱𞤼𞤢 𞤢𞤪𞤣𞤭𞥅𞤯𞤮 𞤤𞤭𞤺𞥆𞤮𞤪𞤣𞤫 𞤀𞤁𞤀𞤊𞤌𞥅 𞤃𞤉𞤁𞤋𞤒𞤀𞥄 𞤮𞤲⹁ 𞤤𞤢𞤥𞤭𞥅𞤲𞤭 𞤺𞤭𞤪𞤢𞤧𞤭𞥅⹁ 𞤩𞤢𞥄𞤱𞤮 𞤮 𞤺𞤮𞤤𞥆𞤵𞤣𞤫 𞤯𞤮𞤲 𞤣𞤵𞥅𞤩𞤭 𞥑𞥓.
𞤼𞤢𞤥𞤦𞤢𞥄 𞤸𞤢𞤪𞤭 𞤳𞤮 𞤸𞤫𞤧𞤤𞤮𞥅𞤱𞤮 𞤤𞤮𞤤𞥆𞤵𞤯𞤮⹁ 𞤵𞤪𞤳𞤢 𞤸𞤢𞥄𞤤𞤢𞥄𞤶𞤮 𞤥𞤮 𞤴𞤭𞤥𞤩𞤫 𞤦𞤵𞤴 𞤴𞤭𞤯𞤵𞤲𞤮𞥅 𞤫 𞤧𞤢𞥄𞤸𞤭 𞤧𞤢𞤦𞤵 𞤸𞤢𞥄𞤤𞤢 𞤥𞤢𞤳𞥆𞤮 𞤤𞤢𞤦𞤢𞥄𞤳𞤢 𞤵𞤪𞤳𞤵𞤳𞤢 𞤳𞤢𞤲⹁ 𞤫 𞤧𞤢𞤦𞤵 𞤣𞤢𞤪𞤲𞤣𞤫 𞤥𞤢𞤳𞥆𞤮 𞤫 𞤽𞤭𞤻𞤵𞤺𞤮𞤤 𞤤𞤢𞥄𞤥𞤵 𞤩𞤮𞤴𞤤𞤭𞥅𞤲𞤺𞤵. 𞤳𞤮 𞤲𞤫𞤯𞥆𞤮 𞤳𞤢𞤣𞤭 𞤱𞤢𞥄𞤱𞤭𞤯𞤮 𞤴𞤫𞤱𞤼𞤫𞤪𞤫⹁ 𞤱𞤢𞤯𞤮𞥅𞤱𞤮 𞤼𞤫𞤱𞤼𞤫𞤱𞤶𞤫 𞤤𞤢𞤦𞤢𞥄𞤯𞤫.
𞤌 𞤱𞤢𞤴𞤲𞤭𞤼𞤭𞤳𞤫 𞤲𞤮𞤲 𞤬𞤫𞤱𞤲𞤣𞤮 𞤳𞤢 𞤳𞤭𞤦𞤭𞤪𞤺𞤢𞤤 𞤫 𞤰𞤫𞤱𞤤𞤮𞤱𞤢𞤤 𞤫𞤧𞤨𞤢𞥄𞤧𞤭 𞤲𞤺𞤢𞤤 𞤮𞤥𞤦𞤢𞥄 𞤩𞤵𞤪𞤭𞥅 𞤲𞤭𞥅 𞤤𞤫𞤦𞥆𞤭 𞤶𞤫𞥅𞤺𞤮𞥅.
𞤳𞤮 𞤳𞤢 𞤳𞤢 𞤯𞤫𞤪𞤮𞤤 𞤥𞤢𞤳𞥆𞤮 𞤬𞤫𞥅𞤧𞤦𞤵𞤳 𞤮 𞤸𞤮𞤤𞥆𞤭𞤼𞤭 𞤳𞤵𞤥𞤨𞤭𞤼𞤢𞤤 𞤲𞤺𞤢𞤤 𞤫 𞤲𞤣𞤫𞥅 𞤥𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥔 𞤷𞤮𞤤𞤼𞤮 𞥒𞥐𞥒𞥕 𞤳𞤢 𞤻𞤢𞤤𞤮𞤪𞤥𞤢 𞤯𞤮𞥅.
𞤳𞤢 𞤯𞤫𞤪𞤮𞤤 𞤥𞤢𞤳𞥆𞤮 𞤬𞤫𞥅𞤧𞤦𞤵𞤳 𞤮 𞤸𞤮𞤤𞥆𞤭:
𞥞 𞤣𞤢𞤥𞤢𞤤 𞤺𞤮𞥅 𞤸𞤭𞤲𞤮 𞤮𞤥𞤦𞤫𞥅⹁ 𞤺𞤮𞤲𞤺𞤢𞤤 𞤺𞤮𞥅 𞤸𞤭𞤲𞤮 𞤵𞤣𞥆𞤭𞤼𞤫𞥅.
𞤇𞤢𞥄𞤱𞤮 𞤣𞤵𞥅𞤩𞤭 𞥑𞥓 𞤼𞤭𞥅𞤯𞤵𞤯𞤭⹁ 𞤫 𞤱𞤫𞤤𞤼𞤢𞥄𞤪𞤫 𞤥𞤢𞤱𞤲𞤣𞤫⹁ 𞤳𞤢 𞤤𞤭𞤺𞥆𞤮𞤪𞤣𞤫 𞤀𞤁𞤀𞤊𞤌𞥅 𞤃𞤉𞤁𞤋𞤒𞤀𞥄 ⹁ 𞤳𞤭𞤶𞤮𞥅𞤪𞤫 𞤺𞤮𞥅 𞤸𞤫𞤱𞤼𞤭𞥅 𞤥𞤭𞤯𞤮 𞤶𞤢𞤩𞥆𞤮𞥅 𞤲𞤶𞤭𞤤𞥆𞤵 𞤸𞤫𞤧𞤵.
𞤉 𞤩𞤫𞤪𞤲𞤣𞤫 𞤸𞤫𞥅𞤱𞤲𞤣𞤫 𞤴𞤵𞤪𞤥𞤫𞥅𞤲𞤣𞤫⹁ 𞤥𞤭𞤯𞤮 𞤧𞤫𞤲𞤣𞤮𞤣𞤢 𞤫 𞤥𞤮𞤲 𞤯𞤮𞥅 𞤲𞤺𞤵𞥅𞤪𞤲𞤣𞤢𞤥 𞤢𞤥 𞤳𞤢 𞤦𞤢𞤽𞥆𞤫 𞤤𞤭𞤺𞥆𞤫 𞤢𞤥 𞤼𞤫𞤲𞤼𞤵𞤯𞤫.
𞤃𞤭𞤯𞤮 𞤬𞤵𞤯𞥆𞤮𞤪𞤢 𞤴𞤫𞤱𞤼𞤫𞤪𞤫 𞤲𞤣𞤫𞤲 𞤶𞤢𞥄𞤪𞤲𞤺𞤮𞤤 𞤫 𞤴𞤫𞤼𞥆𞤵𞤺𞤮𞤤 𞤺𞤮𞤪𞤳𞤮 𞤸𞤫𞥅𞤪𞤭𞥅𞤯𞤮:𞤮𞤲 𞤳𞤮 𞤂𞤀𞤃𞤋𞥅𞤐𞤋 𞤘𞤋𞤈𞤀𞤅𞤋𞥅: 𞤮 𞤸𞤮𞥅𞤤𞤭𞤳𞤫 𞤤𞤢𞤥 𞤬𞤫𞤱𞤲𞤣𞤮 𞤥𞤭 𞤸𞤵𞤼𞤭𞤲𞤭𞤲𞤮𞥅 𞤩𞤢𞤴 𞤸𞤢𞤪𞤭 𞤥𞤭 𞤢𞤲𞤣𞤢𞥄𞤳𞤢 𞤸𞤢𞤴 𞤧𞤫𞥅𞤯𞤢⹁ 𞤥𞤭 𞤢𞤲𞤣𞤭𞤪𞤢𞥄𞤳𞤢 𞤳𞤢𞤣𞤭 𞤸𞤢𞤴 𞤬𞤵𞤧⹁ 𞤮 𞤬𞤮𞤲𞤼𞤢𞤲𞤭𞤥𞥆𞤭 𞤶𞤵𞤲𞤺𞤮⹁ 𞤮 𞤶𞤢𞤩𞥆𞤮𞤪𞤭𞤥𞥆𞤭 𞤱𞤫𞥅𞤪𞤲𞤵𞤺𞤮𞤤 𞤼𞤢𞤥𞤦𞤭𞤼𞤮𞥅⹁ 𞤮 𞤸𞤭𞤪𞤶𞤭𞤲𞤭𞤥𞥆𞤭⹁ 𞤮 𞤧𞤵𞥅𞤧𞤲𞤭𞤥𞥆𞤭 𞤼𞤮𞥅𞤲𞤭𞤲 𞤰𞤵𞥅𞤷𞤢𞤤 𞤢𞤥 𞤲𞤺𞤢𞤤⹁ 𞤦𞤢𞤤𞥆𞤢𞤤 𞤥𞤢𞤳𞥆𞤮 𞤲𞤺𞤢𞤤 𞤫 𞤢𞤥⹁ 𞤸𞤮𞥅𞤤𞤢𞥄𞤪𞤫 𞤲𞤣𞤫 𞤮 𞤸𞤮𞥅𞤤𞤭𞥅𞤥𞤭 𞤲𞤣𞤫𞤲⹁ 𞤧𞤫𞤸𞤭𞤤𞤢𞤴𞤢𞥄𞤺𞤢𞤤 𞤥𞤢𞤳𞥆𞤮⹁ 𞤲𞤺𞤢𞤤 𞤯𞤵𞤴𞤼𞤮𞤼𞤢𞥄𞤳𞤮⹁ 𞤫 𞤲𞤺𞤢𞤤 𞤥𞤢𞤪𞤢𞥄 𞤳𞤫𞥅𞤪𞤮𞤤⹁ 𞤱𞤢𞤤𞥆𞤭𞤼𞤭𞤳𞤫 𞤤𞤢𞤥 𞤳𞤢 𞤺𞤮𞤤𞥆𞤫 𞤫 𞤳𞤢 𞤸𞤵𞥅𞤱𞤮𞤲𞤣𞤭𞤪𞤫 𞤢𞤥 𞤳𞤮 𞤯𞤵𞥅𞤯𞤭 𞤳𞤮 𞤤𞤭𞤥𞤼𞤮𞤼𞤢𞥄𞤳𞤮⹁ 𞤧𞤢𞤦𞤵 𞤳𞤮 𞤢𞤥 𞤸𞤮𞤤𞥆𞤭𞤥𞥆𞤭 𞤺𞤭𞤲𞤫𞤲𞤢𞥄𞤩𞤫 𞤩𞤫𞤲. 𞤢 𞤶𞤢𞥄𞤪𞤢𞥄𞤥𞤢 𞤧𞤢𞤲𞥆𞤫 𞤤𞤢𞤥𞤭𞥅𞤲𞤭 𞤺𞤭𞤪𞤢𞤧𞤭𞥅 𞤥𞤭 𞤴𞤫𞤶𞥆𞤭𞤼𞤢𞤼𞤢𞥄 𞤦𞤢𞤤𞥆𞤢𞤤 𞤲𞤺𞤢𞤤 𞤱𞤢𞤤𞥆𞤵𞤯𞤢𞥄𞤥𞤭 𞤲𞤺𞤢𞤤.
𞤉 𞤺𞤮𞤤𞥆𞤭𞤣𞤢𞥄𞤩𞤫 𞤢𞤥 𞤸𞤢𞥄𞤱𞤲𞤭𞥅𞤩𞤫⹁ 𞤱𞤮𞤲𞤼𞤢𞤩𞥆𞤫 𞤤𞤢𞤥 𞤧𞤫𞤸𞤭𞤤𞤢𞥄𞤩𞤫⹁ 𞤥𞤢𞤤𞥆𞤢 𞤫𞤤𞤫𞥅 𞤳𞤮 𞤧𞤫𞤸𞤭𞤴𞤢𞥄𞤺𞤢𞤤 𞤲𞤺𞤢𞤤 𞤼𞤭𞥅𞤯𞤭 𞤱𞤮𞤲𞤼𞤢𞤲𞤭𞤥𞥆𞤭 𞤩𞤫𞤴𞤺𞤵𞥅𞤪𞤫⹁ 𞤥𞤭 𞤱𞤫𞤤𞤼𞤢𞤲𞤭𞤳𞤫 𞤮𞤲 𞤬𞤮𞤼𞤢⹁ 𞤷𞤢𞤺𞥆𞤢𞤤 𞤳𞤢 𞤩𞤢𞥄𞤱𞤮 𞤸𞤢𞥄𞤤𞤭𞤪𞤣𞤫⹁ 𞤸𞤭𞤯𞤫𞤲 𞤬𞤭𞤶𞤢⹁ 𞤶𞤢𞤤𞤢⹁ 𞤷𞤢𞤥𞤨𞤭𞤲𞤣𞤭𞤪𞤢⹁ 𞤸𞤭𞤯𞤫𞤲 𞤱𞤮𞥅𞤱𞤮𞤲𞤣𞤭𞤪𞤭 𞤳𞤮 𞤧𞤭𞤬𞤢 𞤥𞤵𞤲 𞤯𞤵𞥅𞤯𞤢𞥄⹁ 𞤯𞤵𞤥 𞤳𞤮 𞤥𞤢𞥄𞤲𞤣𞤫 𞤥𞤫𞤲 𞤤𞤵𞤼𞥆𞤢𞤴𞤲𞤣𞤫 𞤲𞤮𞤲.
𞤑𞤮𞤲𞤮 𞤳𞤢𞤣𞤭 𞤸𞤮𞥅𞤤𞤫𞥅⹁ 𞤶𞤮𞤳𞥆𞤮𞤲𞤣𞤭𞤪𞤢𞤤 𞤥𞤫𞤲 𞤸𞤢𞥄𞤯𞤢𞤼𞤢𞥄 𞤧𞤢𞤦𞤵 𞤴𞤢𞤤𞤼𞤵𞤺𞤮𞤤 𞤤𞤢𞤥⹁ 𞤫 𞤲𞤣𞤫𞥅 𞤤𞤭𞤺𞥆𞤮𞤪𞤣𞤫⹁ 𞤧𞤢𞤦𞤵 𞤳𞤮 𞤥𞤢𞤸𞤭𞤣𞤵 𞤯𞤫𞤲 𞤳𞤮𞤲 𞤸𞤭𞤲𞤮 𞤬𞤫𞤰𞥆𞤭𞤼𞤭 𞤺𞤮𞤤𞥆𞤭𞤣𞤢𞤤 𞤼𞤵𞤲⹁ 𞤮𞤲 𞤤𞤵𞤼𞥆𞤢𞤴 𞤳𞤮 𞤮𞤲 𞤶𞤫𞤴𞤢𞥄𞤩𞤫 𞤫 𞤩𞤫𞤴𞤲𞤺𞤵𞥅𞤪𞤫 𞤩𞤵𞤪𞤩𞤫 𞤸𞤭𞤼𞥆𞤵𞤣𞤫 𞤫 𞤢𞤥⹁ 𞤩𞤫𞤴𞤲𞤺𞤵𞥅𞤪𞤫 𞤲𞤣𞤫 𞤥𞤭 𞤴𞤭𞤯𞤭⹁ 𞤲'𞤣𞤫 𞤥𞤭 𞤲𞤶𞤢𞤲𞤯𞤭 𞤫 𞤥𞤵𞤲⹁ 𞤳𞤢 𞤥𞤭 𞤶𞤢𞤲𞤺𞤭 𞤨𞤭𞥅𞤶𞤭 𞤯𞤭 𞤥𞤭 𞤴𞤫𞤶𞥆𞤭𞤼𞤢𞤼𞤢𞥄 𞤫 𞤲𞤺𞤵𞥅𞤪𞤲𞤣𞤢𞤥 𞤢𞤥 𞤯𞤢𞤲.
𞤥𞤭𞤯𞤮 𞤸𞤭𞤱𞤪𞤮𞥅 𞤳𞤢𞤣𞤭 𞤸𞤫𞤯𞤼𞤮𞤼𞤮𞥅𞤩𞤫 𞤥𞤫𞤲⹁ 𞤳𞤢 𞤳𞤭𞤦𞤭𞤪𞤺𞤢𞤤 𞤫 𞤳𞤢 𞤰𞤫𞤱𞤤𞤮𞤱𞤢𞤤⹁ 𞤥𞤭 𞤴𞤫𞤶𞥆𞤭𞤼𞤢𞤼𞤢𞥄 𞤦𞤢𞤤𞥆𞤢𞤤 𞤥𞤮𞤲 𞤫 𞤺𞤭𞤯𞤺𞤮𞤤 𞤲𞤺𞤮𞤤 𞤴𞤭𞤯𞤵𞤯𞤮𞤲 𞤥𞤭 𞤲𞤺𞤮𞤤⹁ 𞤱𞤮𞤲𞤢𞥄 𞤱𞤢𞤴𞤲𞤭𞤼𞤢𞥄𞤣𞤫 𞤮𞤲⹁ 𞤳𞤮 𞤣𞤢𞤥𞤢𞤤 𞤳𞤫𞤧𞤢𞤤 𞤼𞤵𞤲 𞤵𞤣𞥆𞤭𞤼𞤢𞤲𞤭𞥅𞤥𞤭.
𞤑𞤢 𞤺𞤮𞤤𞥆𞤭𞤪𞤣𞤵 𞤂𞤀𞥄𞤐𞤀𞤂𞤀𞥄⹁ 𞤶𞤢𞤩𞥆𞤭𞥅𞤩𞤫 𞤤𞤢𞤥⹁ 𞤮𞤲 𞤼𞤢𞤱𞤢𞤴 𞤬𞤢𞤴𞤭𞤲 𞤳𞤮 𞤩𞤫𞤴𞤲𞤺𞤵𞥅𞤪𞤫 𞤱𞤮𞥅𞤼𞤫𞤪𞤫 𞤲𞤣𞤫𞤲 𞤼𞤢𞤱𞤮𞤼𞤮𞤲.
𞤱𞤮𞤲𞤢𞥄 𞤲𞤮𞤲 𞤢𞤪𞤢𞤲𞤵𞤲 𞤯𞤵𞤲 𞤲𞤭𞥅 𞤺𞤮𞤤𞥆𞤮𞥅𞤩𞤫 𞤤𞤢𞥄𞤥𞤭𞥅𞤲𞤭 𞤺𞤭𞤪𞤢𞤧𞤭𞥅 𞤸𞤭𞤼𞥆𞤵𞤩𞤫 𞤸𞤭𞤲𞤮 𞤱𞤢𞤴𞤲𞤭𞤼𞤢𞥄𞤣𞤫 𞤫 𞤲𞤣𞤫𞥅 𞤤𞤭𞤺𞥆𞤮𞤪𞤣𞤫⹁ 𞤧𞤢𞤦𞤵 𞤺𞤭𞤦𞤭 𞤣𞤵𞤥𞤦𞤵𞤴𞤢𞥄 𞤷𞤭𞤱𞤤𞤭𞥅 𞤤𞤢𞥄𞤥𞤵 𞤲𞤺𞤵𞤲⹁ 𞤦𞤵𞤴 𞤱𞤢𞤴𞤲𞤭𞤼𞤭𞤳𞤫 𞤧𞤢𞤦𞤵 𞤸𞤫𞤩𞤵𞤺𞤮𞤤 𞤺𞤮𞤤𞥆𞤫 𞤩𞤵𞤪𞤯𞤫 𞤯𞤫𞤲 𞤯𞤮𞤲.
𞤱𞤢𞤲𞤮:
𞤥𞤵𞥅𞤧𞤢𞥄 𞤥𞤮𞤴𞤭𞥅𞤧𞤭 𞤧𞤭𞤤𞥆𞤢𞥄
𞤢𞤲𞤼𞤵𞤱𞤢𞥄𞤲𞤭 𞤳𞤵𞤪𞤵𞤥𞤢𞥄.
𞤥𞤢𞥄𞤬𞤵𞤣𞤭𞤴𞤢 𞤦𞤢𞤲𞤺𞤵𞤪𞤢𞥄.
𞤫 𞤼𞤢𞤥𞤦𞤢𞥄 𞤶𞤢𞤳𞤢𞤪𞤭 𞤥𞤭𞤤𞤭𞤥𞤮𞤲𞤮𞥅.
𞤫𞤲 𞤢𞤲𞤣𞤭𞤼𞤭𞤲𞤢𞤴 𞤼𞤵𞤲⹁ 𞤚𞤀𞤃𞤄𞤀 𞤔𞤀𞤑𞤀𞤈𞤋 𞤃𞤋𞤂𞤋𞤃𞤌𞤐𞤌𞥅⹁ 𞤳𞤮 𞤳𞤢𞤲𞤳𞤮 𞤶𞤮𞤥𞤦𞤭 𞤮𞥅 𞤶𞤭𞤱𞤮 𞤱𞤭𞤴𞤫𞤼𞤫𞥅𞤯𞤮 𞤵𞤥𞥆𞤵 𞤫𞤧𞤼𞤫𞥅𞤪 𞤶𞤫𞤴𞤢𞥄𞤯𞤮 𞤨𞤭𞤼𞤢 𞤥𞤵𞤪𞤼𞤵𞤯𞤮 𞤫 𞤣𞤭𞥅𞤲𞤢 𞤭𞤧𞤤𞤢𞥄𞤥𞤵 𞤱𞤮𞤲𞤼𞤭 𞤳𞤫𞤪𞤫𞤼𞤭𞤴𞤫𞤲.
𞤯𞤵𞤲 𞤰𞤵𞤬𞤭𞤲𞥆𞤮 𞤳𞤢𞤪𞤢𞥄𞤶𞤭 𞤯𞤵𞥅𞤯𞤵𞤩𞤫 𞤳𞤢 𞤤𞤫𞤴𞤣𞤭 𞤺𞤭𞤲𞤫 𞤸𞤢𞥄 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤲𞤣𞤫 𞤼𞤢𞤱𞤣𞤫 𞤸𞤭𞤩𞤫 𞤼𞤮𞥅𞤻𞤭𞤪𞤲𞤮𞥅 𞤼𞤢𞤥𞤦𞤢𞥄 𞤶𞤭𞥅𞤩𞤵𞤺𞤮𞤤 𞤸𞤢𞤹𞥆𞤭𞤤𞤫 𞤵𞤥𞥆𞤵 𞤯𞤫𞤲⹁ 𞤸𞤢𞥄 𞤲𞤢𞥄𞤣𞤢𞤥𞤮 𞤫 𞤣𞤭𞥅𞤲𞤢 𞤢𞤲𞥆𞤢𞤧𞤢𞥄𞤪𞤢 𞤶𞤮𞤥𞤦𞤢 𞤥𞤮 𞤳𞤢𞤣𞤭.
𞤖𞤢𞤴 𞤧𞤭 𞤼𞤢𞤥𞤦𞤢𞥄 𞤴𞤫𞤣𞥆𞤵𞤲𞤮 𞤯𞤵𞤲⹁ 𞤮 𞤸𞤮𞤤𞥆𞤭 𞤳𞤢𞤲𞤳𞤮 𞤳𞤮 𞤩𞤫 𞤢𞤲𞤣𞤭𞤲𞤣𞤭𞤪𞤼𞤢 𞤸𞤢𞤪𞤭 𞤮 𞤲𞤢𞥄𞤼𞤭𞥅 𞤫 𞤣𞤭𞥅𞤲𞤢 𞤢𞤲𞥆𞤢𞤧𞤢𞥄𞤪𞤢 𞤳𞤢𞤲⹁ 𞤳𞤮 𞤧𞤢𞤦𞤵 𞤳𞤮 𞤩𞤫𞤴𞤲𞤺𞤵𞥅𞤪𞤫 𞤥𞤢𞤳𞥆𞤮 𞤲𞤣𞤫𞤲 𞤧𞤫𞤤𞤭𞤥𞤮 𞤢𞤷𞥆𞤭𞤣𞤭 𞤥𞤮 𞤫 𞤸𞤮𞥅𞤪𞤫 𞤥𞤢𞤳𞥆𞤮⹁ 𞤱𞤢𞤯𞤭 𞤸𞤢𞥄 𞤮 𞤼𞤢𞤥𞤦𞤭𞤼𞤭𞥅𞤥𞤮 𞤧𞤢𞤦𞤵 𞤲𞤮𞤲 𞤳𞤮 𞤮 𞤭𞤥𞤢𞥄𞤥𞤵 𞤫 𞤳𞤢𞤲 𞤣𞤭𞥅𞤲𞤢 𞤢𞤲𞥆𞤢𞤧𞤢𞥄𞤪𞤢⹁ 𞤧𞤢𞤦𞤵 𞤯𞤵𞤲 𞤱𞤢𞤯𞤭 𞤴𞤮 𞤮 𞤶𞤮𞤥𞤦𞤵𞤥𞤮 𞤳𞤢𞤣𞤭 𞤳𞤢 𞤬𞤫𞤼𞥆𞤢𞤲𞤺𞤮𞤤 𞤥𞤮 𞤺𞤮𞤲𞤯𞤭.
